Germanıa Ekinshi dúnıejúzilik soǵystan beri alǵash ret óz armıasyn Eýropadaǵy eń myqty kúshke aınaldyrýdy ashyq maqsat etip otyr. 2026 jyldyń basynan bastap 18 jasqa tolǵan nemis azamattaryna áskerı qyzmetke jaramdylyǵyn anyqtaıtyn mindetti saýalnama jiberile bastady. Qazirgi tańda áskerge barý erikti bolǵanymen, qabyldanǵan zań úkimetke qajet jaǵdaıda mindetti qyzmet engizýge múmkindik beredi. Bul qadam Berlınniń qaýipsizdikke degen kózqarasy túbegeıli ózgergenin kórsetedi.
Reseıdiń Ýkraınadaǵy soǵysy Germanıadaǵy áskerı saıasattyń basty qozǵaýshy kúshine aınaldy. Bılik 2026 jyly qarýly kúshterdi jańǵyrtýǵa 108 mlrd eýro bólýdi josparlap otyr, bul eldiń JİÓ-niń shamamen 2,5 paıyzy. 2030 jylǵa qaraı bul kórsetkish 3,5 paıyzǵa jetýi tıis. Qazirgi tańda Bundeswehr qatarynda 184 myńǵa jýyq áskerı qyzmetker bar, al NATO aldyndaǵy mindet boıynsha bul san 2035 jylǵa qaraı 260 myńǵa jetkizilýi kerek. Sonymen qatar rezervtegi ásker sany da eki ese ulǵaıtylady.
Mańyzdy betburys tek qarjy men adam resýrstarynda ǵana emes, tehnologıalyq baǵytta da baıqalady. Germanıa Ýkraınadaǵy soǵys tájirıbesin eskere otyryp, drondar men ushqyshsyz júıelerdi óz aýmaǵynda óndirýdi bastap ketti. Bul óndiris tek Bundeswehr qajettiligi úshin emes, sonymen qatar Ýkraınaǵa áskerı-tehnıkalyq qoldaý kórsetýge baǵyttalǵan. Berlın dron soǵysynyń qazirgi qaqtyǵystardaǵy sheshýshi rólin moıyndap, barlaý, shabýyl jáne elektrondy qarsy is-qımyl tehnologıalaryna basymdyq berip otyr.
Sonymen birge Germanıa qoǵamynda AQSH-qa degen senimniń aıtarlyqtaı tómendeýi baıqalady. Sońǵy saýalnamalarǵa sáıkes, nemisterdiń basym bóligi Vashıngtonnyń Eýropanyń qaýipsizdigine kepil bola beretinine kúmánmen qaraıdy. Donald Tramptyń ulttyq qaýipsizdik strategıasyndaǵy Eýropaǵa qatysty qatqyl rıtorıkasy bul senimsizdikti kúsheıtti. Nátıjesinde Germanıada eýropalyq ıadrolyq tejeý tetigin qurý jáne «eýropalyq NATO» ıdeıasyna qoldaý artyp keledi.
Sarapshylardyń aıtýynsha, Germanıanyń áskerı kúsheıýi Máskeýdi alańdatpaı qoımaıdy. Reseı tarapy Berlındi tikeleı qarsylasýǵa daıyndalyp jatyr dep aıyptaıdy. Alaıda nemis bıligi úshin bul – agresıaǵa jaýap emes, uzaq jyldar boıǵy strategıalyq nemquraılylyqtyń ornyn toltyrý. Ýkraınadaǵy soǵys Germanıaǵa bir shyndyqty aıqyn kórsetti: Eýropanyń qaýipsizdigi endi syrtqy kúshterge ǵana senip qalmaýy tıis, al ýaqytty sozý strategıalyq qatelikke aınalýy múmkin.
