Almaty oblysy Aqsý aýdanyna qarasty aýyldyq okrýgtardyń biriniń býhgalteri 1149000 teńge kóleminde memleket qarajatyn jymqyrǵany úshin bes  jyl merzimge bas bostandyǵynan aıryldy. Bul týraly «Qamshy» portaly Almaty oblystyq sotynyń baspasóz qyzmetine silteme jasap habarlaıdy.

Sot prosesi barysynda «Esebolat aýyldyq okrýgy» memlekettik mekemesiniń býhgalteri memlekettik qyzmetterdi júzege asyrýshy laýazymdy tulǵa bola tura aǵymdaǵy jyldyń naýryz-mamyr aılary aralyǵynda búdjet qarajatyn óziniń esepshotyna eńbekaqy túrinde zańsyz aýdaryp kelgeni anyqtaldy. Memleketke keltirilgen shyǵynnyń jalpy kólemi 1149000 teńgeni quraǵan. Býhgalter QR QK-niń «Memlekettik qyzmetterdi oryndaýǵa ókiletti tulǵanyń senip tapsyrylǵan múlikti asa iri kólemde ıemdenýi» baby boıynsha aıypty dep tanylyp, bes jyl merzimge bas bostandyǵynan jáne ómir boıy memlekettik qyzmetke ornalasý quqyǵynan aıryldy.