Búgin Astanada ótken qazaq-japon bıznes-forýmy barysynda «Báıterek» holdıńiniń enshiles kompanıasy – Qazaqstannyń damý banki (QDB) Japonıanyń Sumitomo Mitsui Banking Corporation bankinen 37290000 AQSH dollary kóleminde qaryz alý týraly kelisimge qol qoıyldy, - dep habarlaıdy «Qamshy» portaly Qazaqstannyń damý banki qoǵammen baılanys qyzmetine silteme jasap.

«Búgingi kelisim biz úshin óte tıimdi sharttarmen jasalyp otyr. Biz bul kelisim boıynsha osy qarajatti ıgermegen jaǵdaıda qandaı da bir jaýapkershilik almaımyz. Japonıa taraby buǵan da kelisip otyr. Bank josparynda jekelegen klıentter boıynsha qorlandyrýdyń qymbat kózderin barynsha arzanyna aýystyrý bar. Bul kelisim klıenttermen tıimdi jumysqa yqpal etip, banktiń qaryz portfelin jaqsartady, jobalarǵa qatysty táýekelderdi azaıtady», - dedi QDB-y basshysy Bolat Jámishev.

Japon  bankinen 7 jyl merzimge alynǵan bul qarajat damý bankiniń jalpy korporatıvtik maqsattaryna nemese ınvestısıalyq jobalardy qarjylandyrý kózderin almastyrýǵa jumsalatyn bolady. Eki bank arasyndaǵy áriptestik týraly kelisim alǵash ret 2008 jyly jasalǵan bolatyn.