Qytaı halyq respýblıkasynyń eń joǵory bıliginiń baspasóz organy sanalatyn «Rynmın Rybao» (Halyq gazety) 2015 jyldyń 25 tamyzdaǵy sanynda Qytaıdyń Qoǵamdyq qaýipsizdik mınıstrliginiń osy jyldyń 22 tamyzyndaǵy buıryǵyna silteme jasaı otyryp, endigi jerde Qytaı qoǵam qaýipsizdik (ishki ister) taraýlarynyń 18 túrli anyqtamany bermeıtindigin jarıalady. Sonyń 14-i «zańǵa qaıshy qylmysynyń bar nemese joqtyǵy» jónindegi anyqtama. Onda atalǵan anyqtamany ne sebepti budan bylaı jeke tulǵanyń ózine bermeıtindigi (buryn Qytaıdyń óz ishinde erekshe qajet bolǵan nemese azamattyń jeke basyna baılanysty kúdik-kúman týyndaǵan jaǵdaıda ǵana berilip kelgen) jónindegi quziretti mınıstrlik bylaısha túsindiripti: «Kez-kelgen jeke tulǵanyń qylmysqa qatystylyǵy jónindegi málimet qoǵamdyq qaýipsizdik mekemeleriniń ishki sharýasy, sol sebepti, memlekettik ákimshilik jáne ádilet mekemeleri jeke tulǵanyń saıası tolymdylyǵyn teksergisi jáne de jeke tulǵaǵa qatysty basqa da jaǵdaıattardy anyqtaǵysy kelse, al, kásip oryndar men qoǵamdyq mekemeler óz qarmaǵyndaǵy asa mańyzdy degen laýazymdy oryndarǵa taǵaıyndamaqshy bolǵan jeke adamdar jaıly tolyq maǵlumat alǵysy kelse, tekserý ókilettigi bar quzyretti adamdaryn jumsap, arnaıy qyzmettik kýáligimen jáne atalǵan mekemelerdiń arnaıy qatynas hatymen kelgen jaǵdaıda ǵana berilýi múmkin» deı kele: «Al, jeke tulǵanyń óz qolyna atalǵan anyqtama budan bylaı esh qashan berilmeıdi»-dep bir-aq kesipti.

   QHR-sy Qoǵamdyq qaýipsizdik mınıstrliginiń atalǵan buıryǵyna sáıkes, Qytaıdan elge oralatyn aǵaıyndar  QR-sy İshki ister organdarynyń talabyn oryndaımyn dep endigi jerde «qylmystyq jaǵdaıǵa baılanysty anyqtamany» Qytaıdyń quzyretti organdarynan surap bos áýrege túspegeni jón. Jalǵan anyqtama ákelip, jazyqty bolýdan tipti de saq bolyńyzdar,aǵaıyn!

Raqym AIYPULY