Májilis depýtattary jaqyn kúnderi jalaqylaryn ósirý týraly bastama kótermeıdi. Bul týraly «Qamshy» portaly «Astana» arnasyna silteme jasap habarlaıdy.

Depýtattar ınflıasıaǵa baılanysty barlyq salada baǵa kóterilip jatsa da ózderiniń jalaqylary ózgerissiz qalǵanyna esh ókinbeıdi. Muny olar eldiń ekonomıkalyq ahýalyndaǵy aýyr jaǵdaımen túsindiredi. Qolyna aı saıyn 497 myń teńge alatynyn aıtqan Májilis depýtaty, «Nur Otan» fraksıasynyń múshesi Gleb Shegalskıı bul jalaqy ózin tolyq qanaǵattandyrady dep sanaıdy.

«4 jyl boldy bizdiń shaqyrylymnyń jumys istep jatqanyna. Esterińizde bolsa, «B» korpýsyndaǵy memlekettik qyzmetshilerdiń jalaqysy ósirildi, bizdiki ózgerissiz qaldy. Biraq, óz basym depýtattardyń eńbekaqysy jetkilikti dep sanaımyn», - degen.

«Nur Otandyq» taǵy bir depýtat Serikjan Qanaev ta jýrnalıserge qazirgi ýaqytta eń aldymen otandyq ekonomıka men búdjettiń jaǵdaıyn oılaý kerektigin, jaǵdaı túzelgen kezde bul máselege qaıta oralýǵa bolatynyn aıtqan.