4 myńnan astam úleskerdiń aqshasyn jınap alyp, qashyp ketken "Azbýka jılá" qurylys kompanıasynyń jetekshisi Avstrıada jasyrynyp júr eken. Bul týraly «Qamshy» portaly 31.kz-ke silteme jasap habarlaıdy.

Májiliste depýtat bolǵan Erqanat Taıjanov týraly bul málimetti Astana qalasynyń prokýrorlary resmı rastady. Sóıte tura, quqyq qorǵaý organy qurylys kompanıasynyń basshysyn elge alyp kelý týraly suranys jasamaǵan eken. Elordadaǵy úleskerlik máselesi boıynsha baspasóz quraldaryn jınaǵan prokýrorlar eń aldymen qaladaǵy jalpy ahýalǵa toqtaldy. Alaıda, tilshilerge qurǵaq baıandama emes, halyqty aldaǵandardyń zań aldynda jaýap bergeni týraly naqty aqparattar qyzyqty boldy. Ásirese, 4 myńǵa jýyq úleskeri úıine jete almaı júrgen "Azbýka jılá" kompanıasynyń basshysyna qatysty suraq kóp qoıyldy. Buǵan deıin eks-depýtat Erqanat Taıjanovtyń shetelde jasyrynyp júrgeni týraly qaýesetter taraǵan bolatyn. Atalǵan jıynda bul boljamdy resmı organ rastady.

– Taıjanovty qamaýǵa alý týraly syrttaı sheshim shyǵarylǵan. Oǵan halyqaralyq izdeý jarıalandy. Kýágerlerdiń jaýaptaryna súıensek, Taıjanov Avstrıada, Vena qalasynda degen boljam bar, – Astana qalalyq prokýratýrasy basqarmasynyń prokýrory Tımýr Kópbosynov

Ázirge 27 mıllıardty jymqyrdy delingen kúdiktiniń qaıda ekeni belgili. Biraq ony elge ákelýge áli erte sıaqty. Óıtkeni, Qazaqstan men Avstrıa arasynda ekstradısıalaý týraly kelisim joq eken. Onyń ústine Erqanat Taıjanovqa qatysty tergeý áli aıaqtalmaǵan.