Almatyda ákim aýysa salysymen eski ákim Ahmetjan Esimovtyń burynǵy orynbasarlary da birinen soń biri qyzmetterinen bosady. Jańa ákim Baýyrjan Baıbek apparat jetekshisinen bastap, barlyq orynbasarlaryn jańalap aldy. Esimovtiń eski kolodasyndaǵy laýazym ıeleri qaıda ketti? Qyzmetsiz qalǵandary bar ma? Sońǵy taǵaıyndaýlarǵa bir kóz júgirtip ótsek.
2008 jyly Almatyǵa kelgende A. Esimovtyń birden qyzmetin joǵarylatqan adamy Erbol Shormanov edi. Qalalyq kásipkerlik jáne ónerkásip basqarmasyn basqaratyn ony A. Esimov kele salysymen ákim apparatynyń jetekshisi etip taǵaıyndady. Bir jyldan soń Erbol ákim orynbasary oryntaǵyna aýysqan bolatyn. Bas qalada ákim aýysqanda ol Ahmetjannyń artynan ketkendi jón sanady. Búginde «Astana EKSPO-2017» ulttyq kompanıasy basqarma tóraǵasynyń, ıaǵnı, taǵy da A. Esimovtyń orynbasary. Almatyda jeti jyl ákimdik etkende janynan tastamaǵan Shormannyń Erboly Esimovke Astanada da serik bolmaq.
Ahmetjan ákimdikten túse sala qyzmetin ótkizgen sheneýniktiń biri – Sergeı Kýıanov. Alyp shahar ákiminiń keńesshisi hám baspasóz-hatshysy qyzmetin qatar atqarǵan S. Kýıanov myrza da A. Esimovtyń etegine oratylyp Astana asty. Bul myrzanyń ákimdiktegi laýazymdy qyzmetti sońǵy eki jylda jergilikti «Almaty» telearnasynyń basshylyǵymen qosa alyp júrgeni de kóptiń esinde. Sol kezde Kýıanovtyń quqaıyn kórgen bir top jýrnalıs uıymdasqan túrde telearnadaǵy qyzmetterinen óz erikterimen shyǵyp ketken bolatyn.
Sonymen, Sergeı myrza qyzmet tappaı sergeldeńge tústi deı almaımyz. Ol búgin – 2017 jylǵa deıin «hıt-kompanıa» mártebesine ıe «Astana EKSPO-2017-niń» qoǵammen baılanys departamentinde dırektor.
A. Esimovtyń orynbasarlarynyń ishinde bir jalǵyz áıel bolǵan. Iá-ıá! İshki saıasat salasyna jaýapty Záýresh Amanjolovany aıtyp otyrmyz. Ol kisi de ákimdikte qala almady. Biraq, B. Baıbektiń «Nur Otandaǵy», ıaǵnı, partıa qalalyq fılıaly tóraǵasynyń orynbasarlyǵyna taǵaıyndaldy.
Ákim orynbasarlyǵynan sońǵylardyń biri bolyp bosaǵan – Iýrıı Ilın myrza aıdy aspanǵa shyǵardy dese de bolady. Iý. Ilın myrzanyń qala deńgeıindegi nemese áldebir kompanıalardyń quramyndaǵy «kezekshi» laýazymdarǵa emes, Aqordaǵa biraq barýy, Prezıdent Ákimshiliginiń memlekettik ınspektory bolyp taǵaıyndalýy ákimdik dálizindegi sáýegeıler de, kók bazardaǵy kóripkelder de kútpegen jaǵdaı bolǵan sıaqty.
Endi ol jer-jerdegi ákimderdiń Elbasy tapsyrmalaryn oryndaý jumystaryna baqylaý jasaıtyn bolady.
A. Esimovtiń eski orynbasarlary osyndaı qyzmetterge jaıǵasty. Aıtsa da, qalalyq ákimdikte qarjy salasyna jaýapty bolǵan Murat Qudyshevtyń qaıda taǵaıyndalǵany ázirge belgisiz bolyp otyr. Eski qyzmetindegi esep-qısabynda qatelikter bolmasa, kóp uzamaı ol kisi de jaıly oryndardyń birine jaıǵasar dep oılaımyz.
Darhan Muqan
