ASTANA. QazAqparat - Keshe, 16 qyrkúıek kúni Q.A.Iasaýı atyndaǵy Halyqaralyq qazaq-túrik ýnıversıtetinde Máýlana, Akademıalyq utqyrlyq baǵdarlamasy boıynsha oqýǵa jiberilgen 400 stýdentti shyǵaryp salý rásimi ótti.
Elbasy Nursultan Nazarbaev Aqordada ótken Túrki Keńesiniń V samıtinde sóılegen sózinde Qoja Ahmet Iasaýı atyndaǵy Halyqaralyq qazaq-túrik ýnıversıtetin Túrki áleminiń ortaq oqý ornyna aınaldyrýdy usynǵan bolatyn.
Qazirgi tańda Ahmet Iasaýı ýnıversıteti qabyrǵasynda 1200-den astam Túrki dúnıesinen kelgen jastar bilim alyp jatyr. Oqý orny óz mısıasyna tán jyl saıyn túrki áleminiń 15 elinen 28 ult pen ulystyń bilimdi jastaryn oqýǵa qabyldap keledi. Búginde ýnıversıtette 8000-ǵa jýyq stýdent bilim alady.
Bolon úderisine engen álem ýnıversıtetteri arasynda akademıalyq utqyrlyq boıynsha stýdentter almastyrý búginde úlken mańyzǵa ıe bolyp otyr. Osy rette Bolon úderisine engen Ahmet Iasaýı ýnıversıteti de jyl saıyn sheteldik úzdik oqý oryndaryna bilimgerlerdi jiberip keledi.
Olar Túrkıa Respýblıkasynyń Hajettepe, Nejmettın Erbakan, Akdenız, Gazı, Erjıes, Jýmhýrıet, Dúzje, Kyrykkale, Dıdjle, Ialova, R.T.Erdogan, Ýshak, Mýstafa Kemal, Iyldyrym Beıazıt, Abant Izzet Baısal, Karabúk, Kastamoný, Ardahan, Ahı Evran, Býrsa Ýlýdag, Sakará ýnıversıtetterine, sonymen qatar Polsha elindegi Lodz ýnıversıtetteri sekildi úzdik sanalatyn 25 JOO-da aǵylshyn jáne túrik tilderinde dáris tyńdaıdy. Negizgi mamandaqtary medısına, gýmanıtarlyq jáne áleýmettik ǵylymdar, jaratylystaný mamandyqtary bolyp otyr.
Atalmysh saltanatty rásimde ýnıversıtet prezıdenti, profesor Ý.Ábdibekov: «El, jer kórip, mádenıetin tanyp, úlken jetistikke jetińizder. Bundaı 400-den astam stýdentti jiberý jetistigi basqa eshqandaı oqý oryndarynda joq. 29 stýdent Eýropa ýnıversıtetterinde, 397-si Túrkıa ýnıversıtetterinde oqıdy. Bilim, ǵylym toqyp, úlken maman ıesi bolyp shyǵýlaryńyzǵa tilektespin»,-dep ystyq lebizin bildirdi. Damý jáne qarjylandyrý jónindegi vıse-prezıdent M.Nýrsoı da ıgi tilegin bildirip, stýdentterge sáttilik tiledi.
Joldamaǵa ıe bolǵan stýdentter atynan qazaq, túrik, aǵylshyn tilderinde alǵystar aıtyldy. Sondaı-aq, shetelge oqýǵa joldama alǵan bilimger anasy G.Aǵybaeva aq peıilimen alǵysyn aıtyp, barlyǵyna aq jol, sáttilikter tiledi, dep habarlady atalmysh ýnıversıtettiń baspasóz qyzmetinen.
Derekkóz: QazAqparat
