Ońtústik óńirlerdi aralaýǵa kirisken Elbasy Ońtústik Qazaqstan oblysyndaǵy jumys sapary barysynda «Mereıli maqsatymyz – Máńgilik El!» saltanatty is-sharasyna qatysty. Toıǵa jınalǵan halyqty ultymyz úshin ulyq mereke sanalatyn áz Naýryzben quttyqtaǵan Nursultan Ábishuly: «Sizderdiń óńirde merekelik sharalar negizgi meıramǵa deıin toǵyz kún buryn bastalady. Ár kúnge mán-mańyz berý jáne ony izgi isterge arnaý jaqsy bastama. Sonyń arqasynda Naýryz naǵyz izgiliktiń merekesine aınalyp keledi. Bul basqa óńirlerge úlgi bolarlyq bastama», – dedi.
Elimizdiń erteńi – jastarǵa memleket tarapynan bilim berý, densaýlyq saqtaý, jastar saıasatyna erekshe kóńil bólinip otyrǵanyn eskertken Prezıdent jıylǵan jastarǵa aǵalyq aqylyn aıtty: «Búgin osynda kóptegen jastar otyr. Biz jastarymyzdyń jaqsy bilim alýy úshin jańa balabaqshalar, mektepter, ýnıversıtetter salýdamyz. Oblysta «Balapan» baǵdarlamasy aıasynda mektepke deıingi bilimmen balalardyń 70 paıyzy qamtylǵan. Sonymen qatar, ana men bala óliminiń deńgeıi 20 paıyzǵa tómendedi. Ár oblysta medısınany damytý máselelerine zor kóńil bólýdiń arqasynda qazaqstandyqtardyń ortasha ómir jasynyń uzaqtyǵy 70-ke jetti. Bul bizdiń elimizdiń zor tabysy ári damýynyń kórsetkishi dep esepteımin».
Merekelik jıyn barysynda álemdik ekonomıkalyq, saıası jáne dıplomatıalyq daǵdarystardyń beleń alǵanyna qaramastan, Qazaq eli júıeli de turaqty damyp kele jatqanyn jáne buǵan Qazaqstandaǵy aımaqtardyń áleýmettik-ekonomıkalyq kórsetkishteri dálel bola alatynyn aıtqan Elbasy: «Ońtústik Qazaqstan oblysynda búkil el halqynyń 17 paıyzy turady. Óńir aýmaǵy arqyly iri temirjol magıstrali ótedi, «Batys Eýropa – Batys Qytaı» halyqaralyq tranzıttik kólik dálizi salyndy. Áýejaı qaıta jóndelýde. Osy jyldar ishinde oblys ýran óndirisiniń álemdik ortalyǵyna aınaldy. Búginde óńirdiń kenishteri jahandyq ýran óndirisiniń 35 paıyzyn qamtamasyz etip, birinshi oryndy ıelenip otyr, – dedi.
Jıyn sońynda «Nur Otan» partıasynyń taıaýda ótken XVI sezinde belgilengen jańa maqsattar men mindetter týraly eske salyp, barlyq baǵyttar boıynsha jumysty jalǵastyrýǵa shaqyrǵan Nursultan Nazarbaev halyqqa tabys pen baq-bereke tiledi.
Aq tilek pen bata aǵyl-tegil aǵylǵan sharada ardagerlerdiń oblystyq keńesiniń tóraǵasy J.Máýlenqulov, Qazaqstan halqy Assambleıasynyń múshesi N.Shevchenko, jastar odaǵynyń múshesi J.Óserbaev sóz sóılep, jurtshylyqty Naýryz merekesimen quttyqtady.
Saltanatty shara sońynda halyq teatrlandyrylǵan kórinis pen konserttik baǵdarlamany tamashalady. Ońtústiktegi aǵaıynǵa merekelik kóńil-kúı syılaǵan shara Shymkent qalasynyń jańa ákimshilik ortalyǵyndaǵy «Aýylym – altyn besigim» bareleftik sahnasy men «Kókparshy», «Qyz qýý», «Teńge alý», «Búrkitshi» arhıtektýralyq-dekoratıvtik kompozısıalaryn biriktirgen «Naýryz alańynda» ótkizildi. Jalpy aýmaǵy 50 gektar bolatyn biryńǵaı arhıtektýralyq ansámbldiń quramyna tarıhı-ólketaný mýzeıi, dástúr jáne ǵuryptar ortalyǵy, etnopark, jasandy kól jáne qoldanbaly óner sheberhanasy da ornalastyrylypty.
Derekkóz: Túrkistan gazeti
