Búgin Batys Qazaqstan oblysy ortalyǵy Oral qalasynda jol paıdalaný kásiporny jumysshylary Qyzyl armıa sarbazy Mıhaıl Gavrılovke qoıylǵan eskertkishti ornynan alýǵa kiristi. Bul týraly «Qamshy» portaly Azattyq radıosyna silteme jasap habarlaıdy.
Oblystyq tarıhı-mádenı nysandardy qorǵaý ınspeksıasynyń ókili Abzal Baıbekovtiń aıtýynsha, eskertkish memleket qorǵaýyndaǵy nysandar tiziminen 2008 jyly shyǵarylǵan. Bıyl maýsym aıynda Oraldaǵy qorǵanys mınıstrligi áskerı-tehnıkalyq mektebiniń dırektory Quspan Muqataev qalada 15 jastaǵy qyzyl ásker Mıhaıl Gavrılovke 1958 jyly temir-betonnan qoıylǵan eskertkishti basqa jaqqa kóshirýdi usynǵan. Ol Batys Qazaqstan memlekettik ýnıversıtetiniń janynda turǵan eskertkishti qaladaǵy áskerı-tehnıkalyq mekteptiń qasyna kóshirý jaıly usynys jasaǵan.
Sovet kezinde Qyzyl armıa sarbazy Mıhaıl Gavrılovke 20-ǵasyrdyń basyndaǵy azamattyq soǵys kezinde aqtardyń bir ofıserin óltirip, Oraldy basyp alý josparyn qolǵa túsirgeni úshin madaq aıtylatyn. Ol 1919 jyly Novenkoe eldi mekeniniń túbindegi shaıqasta qaza tapqan.
