Teńge baǵamynyń tómendeýine baılanysty QR Parlament Májilisiniń depýtaty Tursynbek Ómirzaqov halyqqa aqshany dollarmen saqtaý týraly keńes berdi. Bul týraly «Qamshy» portaly total.kz–ke silteme jasap habarlaıdy.

Ol turǵyndarǵa teńge turaqsyz bolǵandyqtan qarajatty eýromen jáne dollarmen saqtaǵan abzal degen pikirde.

«Aqshasyn uzaq merzimge saqtaǵysy keletinderge qarajatyn sheteldik valútamen saqtaǵan tıimdirek. Sebebi, biz teńgeniń turaqsyzdyǵyna kýá bolýdamyz. Bizdiń ekonomıka shaǵyn ǵana bolǵandyqtan, teńge bizdiń qarajattarǵa kepil bola almaıdy. Sol sebepti, men múmkindik bolsa, qarajatty sheteldik valútada saqtaǵan jaqsyraq dep sanaımyn. Al qysqa merzimdi qarajatty teńgemen saqtaı berýge bolady», – deıdi depýtat.

Sondaı-aq, depýtat Tursynbek Ómirzaqov qazaqstandyqtarǵa barynsha bıznespen aınalysýǵa keńes berdi.

Eske salsaq, ózge otandyq saıasatkerler buǵan deıin múldem basqasha keńester aıtyp kelgen. Máselen, Ulttyq banktiń burynǵy basshysy Qaırat Kelimbetov birneshe ret turǵyndardy tek otandyq valútada aqsha saqtaýǵa shaqyrǵan bolatyn. Tipti ózi de tek ulttyq valútada aqsha saqtaıtynyn alǵa tartqan edi.

Ulttyq bank tóraǵasynyń orynbasary Qýat Qojahmetov te aqshany teńgemen saqtaý kerek degen pikir bildirgen.