Stambulda ótetin Turkvizyon-2015 konkýrsynda Qazaqstannyń atynan "Orda" toby shyǵady, - dep habarlaıdy «Qamshy» portaly Tengrinews.kz –ke silteme jasap. 

Turkvizyon-2015 ulttyq kezeńiniń fınaldyq týry Beıbitshilik jáne kelisim saraıynda 6 qarashada ótti. Jeńimpaz sms-daýys berý jolymen tikeleı efırde tańdaldy. Aıta keteıik, "Orda" toby 2015 jyly 15 jyldyq mereıtoıyn atap ótken bolatyn. Dastan Orazbekov, Nurlan Alymbekov, Erbolat jáne Esbolat Bedelhandar óz ánderin ózderi jazyp, horeografıasyn qoıady. 

Ulttyq fınalǵa Ardaq Alekeshev, Albına Oganesán, Azamat Bekbergenov, "Araı" toby, AIBOO, Baýyrjan Retbaev, Beıbit Qoshkalıev, Gúlmıra Jumabekova, Dıas Ablaev, Ergen Aıtymbetov, Qamar sulý, Marhaba Sábıeva, Raıym Ýaıys, Rýslan Berdimatov, Rústem Júginisov, "Saryn" toby, Hanaıym qatysty. 

Eske sala keteıik, 2014 jyly qazaqstandyq ánshi Janar Doǵalova Turkvizyon konkýrsynyń jeńimpazy atanǵan bolatyn. Ol kezde konkýrs Qazan qalasynda ótti. Janar Doǵalova "İzin kórem" ánimen óner kórsetip, 225 bal upaı jınady. Turkvizyon - "Evrovıdenıe" baıqaýynyń túrki álemine arnalǵan balamasy. Baıqaýdyń aýdıtorıasy 300 mıllıon adamnan asady. Turkvizyon eń alǵash ret 2013 jyly Túrkıanyń Eskishahar qalasynda ótti. Oǵan 24 eldiń ókili qatysty. Qazaqstannyń atynan baq synaǵan Rin'Go toby fınaldyń qorytyndysy boıynsha toǵyzynshy oryn alǵan bolatyn.