Memlekettik qyzmet salasynda ozyq elderdiń tájirıbesin zerdeleýimiz kerek, alaıda eshqaısysyn kóshirmeýimiz qajet. Búgin Memlekettik qyzmet salasyndaǵy óńirlik habtyń Basqarýshy komıtetiniń tóraǵasy Álıhan Báımenov osylaı málim etti. Bul týraly «Qamshy» portaly QazAqparatqa silteme jasap habarlaıdy.

«Sapany arttyrý birneshe faktorǵa baılanysty. Birinshiden, durys zańnama qabyldaý. Biraq kez kelgen sheteldiń zańyn kóshirip alyp, paıdalanýǵa bolmaıdy. Mysaly, eger kıim tar bolsa, ol adamdy qysyp tastaıdy. Sondyqtan, biz ozyq elderdiń tájirıbesin zerdeleýimiz kerek, alaıda eshqaısysyn kóshirmeýimiz qajet. Ekinshi másele - árbir mınıstrliktiń, árbir ákimdiktiń ishki jumysynyń yrǵaqtylyǵyn qamtamasyz etý, ıaǵnı sheshim qabyldanǵandaǵy sarapshylardyń pikiri eseptelýi kerek, sondaı-aq halyqtyń usynysy nazarǵa alynýy qajet», - dedi Á. Báımenov  Astanadaǵy «Memlekettik qyzmettiń derbestigi» taqyrybyndaǵy semınarda.

Sonymen qatar ol qazirgi zamanaýı tehnologıalardy paıdalana otyryp, halyqqa kórsetiletin qyzmetterdiń sapasyn kóterý kerektigin atap ótti.

«Mine, osynyń barlyǵy birigip kelgende memlekettik qyzmettiń, memlekettiń apparattyń sapaly jumys jasaýyna alyp keledi»,-dedi Á. Báımenov.

Aıta keteıik, semınardy Astanadaǵy memlekettik qyzmet salasyndaǵy óńirlik hab, Ekonomıkalyq yntymaqtastyq jáne damý uıymy, QR Ulttyq ekonomıka mınıstrligi birlesip, Nazarbaev Ýnıversıtetiniń Joǵary memlekettik saıasat mektebi jáne BUU DB qoldaýymen uıymdastyrdy. Onyń jumysyna elimizdiń ortalyq memlekettik organdarynyń jaýapty hatshylary men oblys ákimdikteriniń apparat basshylary, sondaı-aq  BUU DB-nyń Qazaqstandaǵy turaqty ókiliniń orynbasary Mýnhtýıa Altangerel, EYDU Memlekettik sektordy reformalaý basqaramasynyń basshysy Edvın Laý, Kanada basqarý ınstıtýtynyń prezıdenti Marıantonett Flúmen, Nıderlandy Joǵary memlekettik qyzmetiniń burynǵy bas dırektory Ian Vıllem Vek jáne saladaǵy basqa da sheteldik bilikti mamandar qatysýda.