Májiliste palata Spıkeri Qabıbolla Jaqypovtyń tóraǵa­lyǵymen ótken jalpy otyrys­ta depýtat Baqytbek Smaǵul Qazaqstan Respýblıkasynyń Qor­ǵanys mınıstri Imanǵalı Tas­maǵambetovke depýtattyq saýal jol­dady. Onda bylaı delinedi:

«Bul saýaldy joldaýǵa Qazaq­stan Respýblıkasy Ámbebap jekpe-jek federasıasynyń prezıdenti men osy saladan halyqaralyq jáne Qazaqstannyń eńbek sińirgen sport sheberleriniń joldaǵan haty sebep bolyp otyr. Ózińizge belgili, Elbasy N.Á.Nazarbaev halyqqa Jol­daýynda aldaǵy jyldarda el turǵyndarynyń keminde 30%-y buqaralyq sport túrlerimen aınalysýy qajettigin basa aıtty. Memleket basshysy belgilegen osy me­jege qol jetkizýge elimizdiń Ámbebap jekpe-jek federasıasy da úles qosyp keledi.

2010 jyly óz jumysyn bas­taǵan sporttyń bul túri balalar men jastardyń sportqa tartylýyna óte kúshti yqpal etip otyr. Onyń ústine, ámbebap jekpe-jek sportshylary óz jeńisterimen Otanymyzdyń bedelin halyq­ara­lyq deńgeıde arttyra túsýde. Bul rette, Federasıanyń qarqyn­dy da jemisti jumysyn atap ótken jón. Osyǵan dálel, 2011-2013 jyldar ara­lyǵynda sportshylarymyz Anapa, Medyn, Kalınıngrad qala­larynda uıymdastyrylǵan álem chempıonattarynda, sondaı-aq, Tash­kent qalasynda ótken Azıa chem­pıo­natynda barlyq júldeli oryn­dardan kórindi. Eshqashan qor­jyn­dary altyn, kúmissiz bos qaı­typ kórgen emes.

Ámbebap jekpe-jek 2014 jyl qory­tyndysynda ulttyq qura­ma komandalar tizimine, negizgi respýb­lıkalyq jáne halyqaralyq jarys­tardyń kúntizbelik josparyna, tórt jyldyq Olımpıada kezeńin­degi biliktilik talaptary kitap­shalaryna kirdi. Osy kezden bas­tap atalǵan sport túri joǵary sportqa qaraı úlken serpilis jasady.

Byltyr Dýshanbe qalasynda 10 eldiń qatysýymen ótken Azıa chem­pıonatynda Qazaqstan qurama komandasy jalpy esepte 3-orynǵa shyqsa, 2014 jylǵy Máskeýdegi álem chempıonatynda da otandyq qurama komandamyz 35 memlekettiń basym kópshiligin artta qaldyryp, úzdik úshtiktiń qatarynan kórindi. Búginde 14 oblys pen Astana, Almaty qala­larynda jas erekshelikteri boıynsha ámbebap jekpe-jekpen shu­ǵyl­danýshylardyń jáne jattyqtyrýshylardyń sany shamamen 1500 adamǵa jetti. 2014 jylǵa qoıylǵan maqsatty sportshylar tolyǵymen oryndap shyqty. Al ústimizdegi jyly Tashkent qalasynda ótken Azıa chempıonatynda bizdiń sportshylar jańa belesti baǵyndyryp, 11 memlekettiń ishinde jalpy-komandalyq esepte 2-shi tuǵyrǵa kóterildi.

Bul sport túri boıynsha ja­rystardy Federasıa respýb­lı­ka kóleminde de udaıy uıym­das­tyryp turady. Búgingi tańda Aq­tóbe, Atyraý, Mańǵystaý, Qy­zyl­orda, Almaty, Ońtústik Qazaq­stan, Aqmola oblystarynda jáne As­tana, Almaty, Baıqońyr qala­larynda federasıalar ashylyp, Arystan, Suńqar, Arlan, Ber­kýt, Ulttyq Ulan, Aıbyn jaýyn­gerleri óz ónerlerin ortaǵa salyp, kúsh synasyp keledi.

Qurmetti Imanǵalı Nurǵa­lıuly! Biz Qazaqstan sporty úshin álem aldynda ashyq maqtana alamyz. Bul jerde ózińiz basqaryp otyrǵan Qorǵanys mınıstrliginiń de el sportyna jasap otyrǵan qamqorlyǵy jeterlik. Osy oraıda, atalǵan sport túri Qazaqstan Respýblıkasy Qorǵanys mınıstr­ligimen birlese otyryp, ári qa­raı damytylsa degen usynys bar. ­Sebebi, – bul jaýyngerlik sporttyń túri.

Osy maqsatta ámbebap jekpe-jekti áskerı jarystar, basqa da is-sharalarǵa qosý, ol boıynsha áskerı birlikterde sporttyq bólim­der ashý múmkindigin qaras­tyrýyńyzdy suraımyn. Sebebi, osy sport túrindegi kedergi joldardan ótý, pnevmatıkalyq tapanshamen nysanany kózdep atý jáne sporttyq pyshaqty dáldep laqtyryp, nysanaǵa dóp tıgizý sıaqty jattyǵýlar jaýyngerlik daıyndyqqa óte úlken kómegin tıgizedi, Qazaqstan Qarýly Kúsh­teriniń jaýyngerlerin eptilikke, tózim­dilikke, batyldyqqa baýlyp, olar­dan saıdyń tasyndaı irik­telgen saıypqyran sarbaz jasaıdy dep bilemin».

Derekkóz: Egemen Qazaqstan