62-qadam. Ekonomıkanyń shıkizattyq emes salalaryndaǵy orta bıznestiń naqty kóshbasshy kompanıalaryn qoldaýǵa baǵyttalǵan «Ulttyq chempıondar» belsendiligin júzege asyrý.
Bıznes-kóshbasshylardy aıqyndaý noý-haý transferi úshin biliktilik ortalyqtaryn qurý múmkindigin beredi.
Ult jospary – «100 naqty qadam»
Óńirlik kásipkerler palatasynyń bastamasymen Reseı Federasıasy Tomsk oblysynyń kásipkerleri oblysqa kelip, jergilikti áriptesterimen júzdesti. Bıznesmenderdiń túbekke kelý saparynyń basty maqsaty – qazaqstandyq áriptestermen tyǵyz baılanys ornatyp, kásipkerlik salasyn órkendetý. Osyǵan oraı oblystyq kásipkerlik palatasynyń ǵımaratynda arnaıy kezdesý uıymdastyrylyp, oblystyń isker azamattary Tomsk oblysynyń iri kásiporyndarynyń basshylarymen kezdesip, jaqyn tanysyp, erkin suhbattasty.
Basqosý barysynda mańǵystaýlyq kásipkerler saraptamalyq quraldar, ádistemelik jáne baǵdarlamalyq jasaqtama, daıarlaý synamalary qurylǵylaryn, sý, topyraq, aýa, taǵam ónimderindegi ýly qospalardy baqylaýǵa jáne hımıalyq taldaý júrgizýge arnalǵan qosalqy jabdyqtar óndirýmen aınalysatyn «Tomanalıt» ǵylymı-óndiristik kásiporny qyzmetimen tanysty. Sondaı-aq tabıǵı aǵashtan jıhaz jasaıtyn «SP «Tehnoles» JSHS, munaı jáne gaz, munaı hımıasy, komýnaldyq sharýashylyq jáne basqa da salalarǵa arnalǵan jabdyqtardy daıyndaýmen aınalysatyn «NPO «Sıbırskıı mashınostroıtel» jáne ındýksıalyq qyzdyrý júıeleri men keshenderin daıyndaýmen jáne óndirýmen aınalysatyn «Magnıt M» kompanıalarynyń jumysymen jaqynyraq tanysty. Kezdesýde baıandama jasaǵan Tomsk oblysy boıynsha, kásipkerlikti damytý palatasynyń basshysy Dmıtrıı Nemytkov Qazaqstan men Reseı arasyndaǵy yntymaqtastyq pen ózara saýda-ekonomıkalyq qarym-qatynastyń tamyry tereńde jatqanyna toqtaldy. 2008 jyldan bastap Tomsk kásipkerleri elimizdiń Astana, Almaty, Pavlodar, Óskemen, Qaraǵandy, Shymkent qalalarynda 8 bıznes-mıssıa uıymdastyrǵanyn atap ótti. Nátıjesinde, eki el arasynda taýar aınalym 229,4 mln AQSH dollaryn quraǵan.
– Tomsk Batys Sibirde ındýstrıasy damyǵan ortalyq sanalady. Bizde shaǵyn jáne orta kásipkerlik salasy jaqsy jolǵa qoıylǵan. Aımaqtyq ekonomıkanyń 26,03%-y – mashına qurastyrý, 19,65 %-y – azyq túlik óndirý, 4,16%-y – farmasestıkalyq ónimder shyǵarý, 6,59 %-y – aǵash ónimderin óńdeý, 11,94%-y – hımıalyq jáne 8,32%-y – munaı ónimderi men 2,29%-y – plasık jáne rezına buıymdaryn shyǵarý. Jyl sanap aımaq ekonomıkasy damyp keledi. Bıznestiń baǵy belsendilikte, sondyqtan da biz ózge eldermen baılanysty nyǵaıtyp, oblysymyzda kásipkerlik salasyn áli de órkendetý josparda. Sonymen qatar búgingi tańda Tomskte qazaqstandyq bes myńǵa jýyq stýdent bilim alýda. Jalpy, Tomskte 7 memlekettik JOO men 20-ǵa jýyq zertteý ınstıtýty bar. Bul JOO-ǵa da stýdentterdi tartý, kásibı turǵydan daıarlaý jumystaryn da jandandyrǵymyz keledi, – deıdi Tomsk oblysy boıynsha kásipkerlikti damytý palatasynyń basshysy Dmıtrıı Nemytkov.
Kezdesýde eki oblystyń kásipkerleri ózara erkin pikir almasyp, tyǵyz áriptestik pen uzaq merzimdi seriktestik ornatý joldaryn jan-jaqty talqylady. Taýar óndirý men ony ótkizý máselesin de sóz etip, eki oblys arasyndaǵy baılanysty nyǵaıta túsý joldaryna toqtaldy. Kezdesý aıaqtalǵan soń tomskilik bıznesmender oblystaǵy birqatar kásiporyndardy aralap, jumysymen tanysty.
Derekkóz: Aıqyn-aqparat
