Qazaq handyǵynyń 550 jyldyǵyna oraı Aqtaý qalalyq mádenıet jáne tilderdi damytý bóliminiń uıymdastyrýymen jazba aqyndar músháırasy ótti. «Egeýli naıza qolǵa almaı» degen atpen uıymdastyrylǵan jyr dodasyna qaladaǵy oqý ornynyń 15 stýdenti qatysty.
Shara maqsaty – Qazaq handyǵynyń 550 jyldyǵyn merekeleýdiń máni men búgingi tańdaǵy tarıhı mańyzyn ashý, «Máńgilik el» muratyn jas urpaqqa keńinen nasıhattaý.
– Sonymen qatar shara batyr babalarymyzdyń erlik isterin jáne eldiń birligin danalyǵymen uıytqan bı-sheshenderimizdiń otansúıgish ónegesin jastarǵa úlgi etý maqsatynda uıymdastyrylyp otyr. Qatysýshylarǵa qoıylatyn basty talap – qazaq eliniń mádenıeti men salt-dástúrin nasıhattaý, derbes handyq quryp, bilektiń kúshi, naızanyń ushymen eldigin qorǵap qalǵan babalar erligin, búgingi táýelsizdigimizdi jyrǵa qosý, memlekettik tildiń qoldaný aıasyn keńeıtý jáne óleń qudireti arqyly memlekettik tildiń mártebesin kóterý. Keń kólemde ótkiziletin mundaı sharalarǵa qala jastary belsendi túrde qatysatynyn atap ótkim keledi, – deıdi Aqtaý qalalyq mádenıet jáne tilderdi damytý bóliminiń bas mamany Álıa Toǵyzbaeva.
Baıqaýdyń barlyq talaptarynan súrinbeı ótip, qatysýshylardyń arasynan daralanyp kózge túsken Sh.Esenov atyndaǵy KMTjIÝ-diń İİ kýrs stýdenti Gúlden Ómirzaqova bas júldeni ıelendi. Kópbalaly otbasynda tárbıelengen Gúlden qolyna qalam ustap, óleń jazýdy mektep kezinen bastapty. Alǵashqy jyr shýmaǵyn anasyna arnap jazyp, keıin qalalyq, oblystyq, respýblıkalyq jazba aqyndar baıqaýyna qatysýdy dástúrge aınaldyrǵan. Aqtóbe qalasynda ótken respýblıkalyq ǵylymı jobada «Mańǵystaýdyń aıtysker aqyndary» atty jobasyn sátti qorǵap, ekinshi oryndy ıelengen.
– Oblys, respýblıka kóleminde ótkiziletin baıqaýlarǵa únemi belsendi túrde qatysyp, qabiletimdi shyńdap otyramyn. Ártúrli konferensıalarda jıi baıandama oqımyn. Bul joly baıqaý elimizde atalyp jatqan mereıli dataǵa arnalǵandyqtan «Er Tólep» batyr jaıynda óleńimdi usyndym. Baıqaý jeńimpazy atanǵanyma óte qýanyshtymyn. Endi batyr babamyz jaıynda úlken maqala jazýdy qolǵa aldym, sátin salsa, basylym betterinde jaryq kóredi, – deıdi Gúlden Ómirzaqova.
Baıqaýdyń qorytyndysy boıynsha júldeli oryn alǵan ózge de jeńimpazdarǵa uıymdastyrýshylar tarapynan baǵaly syılyqtar men alǵysqattar tabystaldy.
Derekkóz: Aıqyn-aqparat
