Prezıdent Nursultan Nazarbaev usynǵan bes ınstıtýttyq reformanyń júzege asýyna negiz bolatyn 55 zańdy Májilis óte qysqa ýaqyt ishinde túbegeıli qarap, daıyndap úlgerdi. Qaýipti synaqtar men jahandyq turaqsyzdyq kezeńinde daǵdarystyq jaǵdaıdan aman shyǵýdyń jospary búginde zamanaýı jáne ózekti bolyp tabylady. Osy oraıda, Prezıdent usynǵan memlekettiń damý strategıalary álem boıynsha syndarly mánge ıe bolýda. Sonyń ishinde «Qazaqstan-2050» Strategıasy – álemde damyǵan 30 eldiń qataryna qosylýdy maqsat etip qoıǵan elimizdiń jańa saıası baǵyty. Sonymen qatar, memlekettilik pen ekonomıkanyń damýyn jáne onyń álemdik naryqqa shyǵýyn kózdeıtin jobalardyń biri – Elbasymyz usynǵan «Ult jospary – 100 naqty qadam» baǵdarlamasy bolyp tabylady. Osyndaı aýqymdy maqsattardy iske asyrý, eń aldymen mańyzy zor zańdardy qabyldaý arqyly júzege asatyn jańarýlardy talap etedi. Bul oraıda jaýapkershilik Parlamentke júkteldi. Sebebi, zańdardyń kóp bóligi 2016 jyldyń qańtar aıynda kúshine enýi tıis.
Atap aıtatyn jaıt, depýtattyq korpýs ózine júktelgen mindetti kásibı, sapaly jáne tyń serpilispen atqardy. Olardyń Prezıdent usynǵan baǵdarlamany zańdylyq turǵydan qamtamasyz etý úshin alǵa qoıǵan maqsattarǵa jetýde qanshalyqty kúsh-jiger jumsaǵany basqalarǵa qaraǵanda bizge – zańgerlerge túsinikti. Parlament Májilisiniń, onyń ústine Eýrazıa ulttyq ýnıversıtetiniń kóptegen ǵalymdary zań jobalaryn ázirleıtin toptardyń quramynda birge jumys atqardy. Zań shyǵarmashylyq qyzmeti ınemen qudyq qazǵandaı, sebebi bul, eń aldymen, bilimdilikti, jaýapkershilikti, azamattyq pozısıany qajet etetin aýyr eńbek. Osy ýaqyt ishinde jumysshy toptyń 500 otyrysy uıymdastyrylyp, 11 myń naqty zań jobalary boıynsha mamandar shaqyrylyp konsýltasıalar ótkizildi. Sonyń ishinde jartysy qabyldandy. Atap aıtatyn jaıt, Májilis depýtattary qarastyrǵan zań jobalary qoǵamdyq ómirdiń barlyq salalaryn qamtydy. Taǵy bir erekshe atap ótetin másele, jumys kezinde basty nazar qoǵamnyń demokratıalanýyna jáne onyń memleketke degen kózqarasyna oń yqpal etetin azamattyq qoǵam ınstıtýttaryna bólindi.
Reformalardyń jetistigi, kóp jaǵdaıda, memlekettik apparattyń kásibı qyzmetine baılanysty. Demek, Parlament Májilisiniń zańdy talqylaýynan ótken barlyq 55 zań jobalary arqyly Prezıdent N.Nazarbaev baǵdarlamarynyń quqyqtyq qamtamasyz etilýi Qazaqstannyń órkendeýin jáne Máńgilik El uly qundylyqtaryn qalyptastyrýdy júzege asyrady.
Sáýle AMANDYQOVA,
L.N.Gýmılev atyndaǵy Eýrazıa ulttyq
ýnıversıteti zań fakúltetiniń dekany.
ASTANA.
Derekkóz: egemen Qazaqstan
