Keshe Qazaqstan Respýblıkasynyń Ortalyq saılaý komısıasynda (OSK) «Áıelderdiń, jastardyń jáne qoǵamdaǵy áleýmettik osal toptardyń saılaý quqyqtarynyń saqtalýyn qadaǵalaý» taqyrybynda semınar-trenıng ótti.
 Astanada ornalasqan Eýropadaǵy qaýipsizdik jáne yntymaqtastyq uıymy (EQYU) baǵdarlamalar ofısiniń, atalǵan uıymǵa qarasty Demo­kratıalyq ınstıtýttar men adam quqyqtary jónindegi búro­nyń, mınıstrlikterdiń, ortalyq mem­lekettik organdardyń, Qazaqstanda parlamentarızmdi damytý qorynyń jáne úkimettik emes uıymdardyń (ÚEU) ókilderi qatysqan semınardyń ashylý sátinde OSK tóraǵasynyń oryn­basary Vladımır Foos jurt­shylyqqa óziniń quttyqtaý sózin arnady. Sondaı-aq, ol bul basqosýdyń mańyzdylyǵyna toqtala kelip, kórsetilgen taqyryp aıasynda óziniń oı-pikirlerin jetkizdi.
– Búgingi semınar-trenıngtiń áıelderdiń, jastardyń jáne halyqtyń áleýmettik osal toptarynyń saılaý quqyqtarynyń saqtalýyn qada­ǵalaýǵa arnalýynyń ózindik máni bar. Kóbinese eldiń dál osy topta­ry saılaý úderisine jetkilikti deńgeıde tartylmaı qalady. Sonymen qatar, olardyń bılik organdaryna usynylýy da jetkiliksiz, – dedi V.Foos.
Jıyn barysynda Astanadaǵy EQYU baǵdarlamalar ofısi basshy­synyń orynbasary Mırko Gúnter semınarǵa qatysýshylarǵa sáttilik tileı otyryp, azamattardyń saılaý quqyǵyn zańmen qorǵaýdy qamtamasyz etý máselelerin keńinen sóz etti.
EQYU-nyń Demokratıalyq ıns­tı­týttar men adam quqyqtary jónin­degi búrosynyń (DIAQB) saılaý isi boıynsha keńesshisi Radıvoe Grýıch óz kezeginde genderlik teńdikti saqtaý turǵysynda baıandady. Onyń aıtýynsha, genderlik saıasat jáne áıelder quqyqtary týraly keıbir negizgi halyqaralyq standarttar mátinderiniń saılaý úderisine tikeleı qatysy bar.
Al OSK múshesi Lázzat Súleımen áıelderdiń saılaý úderisine qatysýyna baılanysty aıta kelip, 2007-2015 jyldar aralyǵynda elimizde ótken Parlament Senatynyń, Májilistiń, máslıhattardyń, sondaı-aq, aýyl okrýgteri ákimderiniń saılaýlaryna erler men áıelderdiń qatysýyna baılanysty jasalǵan qorytyndy taldaý derekterin keltirdi.
Qazaqstanda parlamentarızmdi damytý qorynyń prezıdenti Záýresh Batalova halyqtyń osal toptarynyń saı­laý quqyqtaryn qorǵaýdy qamta­ma­syz etýdegi azamattyq qoǵamnyń róline basa nazar aýdardy.
OSK múshesi Marat Sársembaev joǵaryda aıtylǵan toptardyń saı­laý quqyqtarynyń BUU men EQYU qujattary aıasynda saqtalý másele­lerine toqtaldy ári osy jónindegi Qazaqstan men uıym araqatynasyn sóz etti.
Sonymen qatar, jıynda qaty­sý­shylar saılaý naýqandarynda adam quqyqtaryn, halyqaralyq baı­qaýdy retteıtin BUU men EQYU-nyń qujattaryn talqylady. Buǵan qosa, olar halyqaralyq baıqaýdyń erekshelikterin qarastyra kelip, Qazaqstan ókilderiniń EQYU/DIAQB mısıalarynyń quramynda júrip jınaǵan tájirıbelerimen bólisti.
Trenıń sońynda qazaqstandyq baıqaýshylardyń tájirıbesin odan ári jetildirý baǵytynda pikir almasý boldy.

derekkóz: egemen Qazaqstan