Búkilálemdik jetistikter kórmesi shejiresinde asa tabysty ótken kórmelerdiń biri dep baǵalanǵan Italıadaǵy «EXPO MILANO-2015» kórmesi saltanatty jaǵdaıda jabyldy. Mılan kórmesiniń jabylý saltanatynda EKSPO týy Qazaqstan Respýblıkasyna tapsyryldy.
Tórtkúl dúnıeniń nazary aýǵan Mılan qalasyndaǵy EKSPO kórmesiniń jabylý shara­syna arnalǵan alqaly jıynda Halyqaralyq kórmeler búrosynyń Bas hatshysy Vısente Lossertales jáne EKSPO-2015 kórmesiniń Bas komısary Brýno Paskýıno saltanatty jaǵdaıda «Astana EKSPO-2017» Ulttyq kompanıasy» AQ basqarmasynyń basshysy Ahmetjan Esimov pen Bas komısar jáne EKSPO-2017-niń komısary Rápil Joshybaevqa EKSPO kórmesiniń týyn tapsyrdy. Italıa respýblıkasynyń prezıdenti Serdjıo Matarella Mılan qalasynda 6 aı boıy jal­ǵasqan Búkilálemdik jetis­tikter kórmesiniń jabylý saltanatynda sóılegen sózinde Italıada ót­ken kórmege qaty­sýshy­lardyń bar­lyǵyna sheksiz alǵy­syn bildirip, «Astana EKSPO-2017-niń» sátti ótýine shy­naıy tilegin bildirdi.
Búkilálemdik jetistikter kórmesiniń tarıhynda Mılanda ótken «EKSPO-2015» kórmesi eń sát­ti kórmelerdiń biri dep baǵa­landy. Bul kórmeni 21 mıllıonnan astam adam tamashalaǵan kórinedi. Álemniń jetekshi memleketteri qatysqan bul kórmede Qazaqstan Respýblıkasynyń Ulttyq pavıl­ony «Kontent jáne taqy­rypty úzdik ashý» nomınasıasy boıynsha eń úzdik úshtiktiń qatarynan tabyldy.
Budan buryn habar­la­ǵany­myzdaı, 23 qazanda Qazaqstan pavılonynyń mıllıonshy qo­naǵy bolyp Italıanyń turǵyny Danıele Bergo tanylǵan bolatyn. Mılandaǵy Qazaqstan pavılonyn kórme ótken merzimde kún saıyn 5 myń adam tamashalap otyrǵan.
Sóıtip, Búkilálemdik jetis­tikter kórmesiniń týy Qazaqstanǵa tapsyryldy. Eske sala ketetin bolsaq, 2012 jyldyń 22 qara­sha­synda ótken HKB-nyń 152-shi Bas assambleıasynda jasyryn daýys berý nátıjesinde Qazaqstan Res­pýb­lıkasynyń elordasy – Astana qalasy EKSPO-2017 Halyq­aralyq mamandandyrylǵan kór­mesin ótkizý qurmetin jeńip alǵan edi. «Astana EKSPO-2017» Ha­lyqaralyq mamandandyrylǵan kórmesiniń basty taqyryby – «Bolashaqtyń energıasy» dep belgilendi. Bul – jyldan-jylǵa planetamyzǵa tıgizetin áseri artyp kele jatqan adamzattyń ener­getıkalyq tutyný problema­syna degen halyqaralyq qaýym­­dastyqtyń úlken alańdaý­shylyǵyn aıqyndaıtyn ózekti taqyryp. EKSPO-2017 kórme­siniń basty taqyryby mynan­daı baǵyttar sheńberinde aıqyn­dalmaq. Olar: Qorshaǵan ortaǵa kómirqyshqyl gazyn shyǵarý kólemin azaıtý; Tıimdi energetıka jaǵdaıyndaǵy ómir salty; Bar­shaǵa birdeı energıa.
Kórmeler tarıhynyń she­ji­resinde alǵash ret Qazaqstan týy 1998 jyly Lıssabon qala­synda ótken EKSPO Halyqaralyq ma­mandandyrylǵan kórmesinde jelbiregen edi. Sodan keıin Qazaqstan 2005 jyly Japonıanyń Nagoıa qalasynda ótken halyq­aralyq kórmege tolyqqandy múshe retinde qatysty. Odan keıin Qazaqstan Respýblıkasynyń Kók baıraǵy 2008 jyly Ispa­nıa­nyń Saragos, 2010 jyly QHR-diń Shanhaı, 2012 jyly Koreıa Respýblıkasynyń Iosý qala­­larynda ótken Búkilálemdik jetistikter kórmesinde jelbiredi.
Elordadaǵy EKSPO-2017 kór­mesi 2017 jyldyń 10 maýsymynda bastalyp, 10 qyrkúıegine deıin jalǵasady dep josparlanýda. Kórmege 100 memlekettiń ókilderi qatysady dep kútilýde. Qazirgi kúnge deıin álemniń 51 memleketi jáne 11 halyqaralyq uıymy «Astana EKSPO-2017» kórmesine qa­tysatyndyǵyn rastady.

Derekkóz: Egemen Qazaqstan