Keshe oblysqa «Nur Otan» partıasy Tóraǵasynyń birinshi orynbasary Asqar Myrzahmetov jumys saparymen keldi. Ol «Nur Otan» partıasy oblystyq fılıalynyń kezekten tys XIX konferensıasyna qatysty.
Oblystyq partıa fılıaly konferen­sıasynyń sheshimimen oblys ákimi Berdibek Saparbaev ob­lystyq fılıaldyń jańa tór­aǵasy bolyp saılandy. Asqar Myr­zahmetov fılıaldyń buryn­ǵy tóraǵasy Arhımed Muham­bet­ov­tiń partıany nyǵaıtý jolyn­daǵy jumystaryna alǵys aıtyp, mem­lekettik qyzmettegi tájirı­besi mol Ber­dibek Saparbaevqa partıanyń ha­lyq arasyndaǵy bedelin ny­ǵaı­­typ, fılıal jumysyn joǵary deń­geıge kóteretinine senimin jet­kizdi.
Konferensıada «Nur Otan» partıasy oblystyq fılıaly tór­aǵasynyń birinshi orynbasary mindetin atqarýshy Nurhan Aǵnıazov «Fılıaldyń 2015 jyl­dyń 9 aıyndaǵy jumysy jáne aldaǵy mindetteri týraly» degen taqyrypta baıandama jasady. Ol qazirgi tańda oblystyq partıa fılıaly jumysynyń basty baǵyty Qazaqstan Prezıdenti Nursultan Nazarbaev aıtqandaı: «Nur Otan» el senimin aqtaýmen qatar, kúrdeli ekonomıkalyq jaǵdaıda óz mańyna jurtshylyqty toptastyratyn partıa bolýy kerek», degen pikirinen tamyr tartatynyn atap ótti.
– Búginde respýblıka deńgeıinde partıalyq jumys ádisin jańǵyrtý baǵytynda sharalar qolǵa alyndy. Oblystyq jáne aýmaqtyq partıa fılıaldaryna jańadan 15 shtat birliginiń berilýi bizge jańa deńgeıde jumys jasaýymyzǵa múmkindik týǵyzdy. İshki tártipti retteýshi qujattardy qaıta reglamentteý – ýaqyt talaby. Fılıaldardyń jumysyn baǵalaýdyń naqty ındıkatorlarynyń anyqtalýy jumysymyzdy retteýge kóp kómegin berýde, – dedi baıandamashy. Onyń aıtýynsha, 2015 jyly oblystyń 27 nysan qurylysyna Ulttyq qordan bólingen 9 mıllıard 133 mıllıon teńgeniń tıimdi jumsalýy partıanyń turaqty nazarynda, halyq tutynatyn áleý­mettik mańyzy bar azyq-túlik ónimderine halyqtyq baqylaý ju­mysy júrgizilýde. Sonymen qatar, jolaýshylar tasymaldaıtyn qoǵamdyq kólikterdiń qozǵalys kes­tesi men dárihanalardaǵy dári-dár­mekterdiń baǵalaryn baqylaý bas­taldy. Kelesi kezekte ol «Nur Otan» partıasynyń oblystyq jáne aý­dandyq, qalalyq fılıaldarynyń 14 qoǵamdyq qabyldaý bólmesi tur­ǵyndarmen tyǵyz baılanysta jumys istep kele jatqanyn atap ótti.
Konferensıada qalalyq más­lı­hattyń depýtaty Almagúl Bekenova sóz alyp, qaladaǵy iri jobalarǵa Ulttyq qordan bólingen qarjynyń maqsatty jumsalýy baǵytynda atqarylǵan isterge toqtaldy. Oıyl aýdandyq jastarǵa patrıottyq tárbıe berý ortalyǵynyń dırektory Aısulý Mámbetova partıalyq jumystaǵy jańashyldyqtyń bas­taýysh partıa uıymdaryna serpin beretinin áńgime ózegine aınaldyrdy. Beıbitshilik jáne kelisim keńesi oblystyq fılıalynyń tóraǵasy Keldibaı Espaǵambetov óz sózinde partıalyq jumystyń jańasha sıpat alǵanyna, «Nur Otan» partıasynyń halyqtyń múddesi úshin qyzmet etetindigine toqtaldy.
Konferensıada «Nur Otan» partıasy Tóraǵasynyń birinshi orynbasary Asqar Myrzahmetov sóz sóıledi. Ol partıalyq jumystyń basty maqsaty Elbasy, partıa Tór­aǵasy Nursultan Nazarbaev atap ótkendeı, «qarapaıym halyq­ty tolǵandyratyn ózekti máse­lelerdi eskerýsiz qaldyrmaý úshin partıanyń óńirlerdegi jumysyn nyǵaıtý» kerek ekendigin jetkizdi. Jergilikti fılıaldardyń kadrlyq áleýetiniń artqany olarǵa júktelip otyrǵan naqty jumystardyń sapasynyń artýyna alǵyshart jasaıtynyn atap kórsetti. Ortalyqta bul máselege aıryqsha kóńil bólinip, fılıaldar qyzmetin baǵalaýǵa arnalǵan nysanaly ındıkatorlar ázirlengenin atap ótti. Partıa fılıaldary jumysynyń tıimdiligin arttyrý maqsatynda partıa Tóraǵasynyń birinshi orynbasary men fılıaldar tóraǵalary arasynda birleken memorandýmdarǵa qol qoıylatynyn jetkizdi. Bul qujat naqty kórsetkishter men ın­dıkatorlar arqyly «Nurly Jol» baǵdarlamasyn, sol sıaqty mem­le­kettik jáne salalyq baǵdarla­malardy júzege asyrýǵa, búdjettiń atqarylýyna partıalyq baqylaýdy júrgizýge qyzmet etetinin málimdedi.
– Kúndelikti jumystardy ońtaı­landyrý, júıelendirý maqsa­tynda qazirgi tańda 30-dan astam qu­jattyń 20-sy qabyldanyp otyr. Atap aıtqanda, fılıaldar jumy­syn baǵalaý ındıkatorlarymen qosa, qoǵamdyq-saıası ahýal­dyń monıtorıńi, kadrlyq rezerv, fılıaldardaǵy saıası keńes búrosynyń jumysynyń tıptik reglamenti jáne qujat aınalymyn qysqartý týraly ishki normatıvtik is qaǵazdary daıyndalýda. Partıa jumysynda bes ınstıtýttyq reforma men «100 naqty qadam» Ult josparyn júzege asyrýǵa halyqty jumyldyrý, memlekettik baǵdarlamalardyń oryndalýyn tıimdi baqylaýdy qamtamasyz etý, osyǵan baılanys­ty el arasynda túsinik jumystaryn júrgizý syndy mindetterge basymdyq berilýde. «Nurly Jol» baǵdarlamasynyń júzege asyrylýyna baqylaýdy kúsheıtý maqsatynda 2015-2016 jyldarǵa arnalǵan sharalar belgilenip, olardyń oryndalýy baqylaýǵa alyndy. Búdjettiń jáne Ulttyq qordan bólingen qarajattyń tıimdi jumsalýyn baqylaý úshin Májilis pen barlyq deńgeıdegi máslıhattardaǵy fraksıalar janynan arnaıy komısıa­lar qurý jóninde ereje daıyndaldy. Baqylaý júrgizýdiń jańa krıterııleri jasalyp, óńirlerden alynatyn málimetterdi birizdendirý jumystary qolǵa alyndy, – dedi A.Myrzahmetov.
Oblystyq fılıaldyń jańadan saılanǵan tóraǵasy, oblys ákimi Berdibek Saparbaev partıalastaryna senimderi úshin rızashylyǵyn bildirip, ózine zor jaýapkershilik júktelip otyrǵanyn aıtty. Sondaı-aq, jańa úderisterge baılanysty partıa jumysyn jandandyrýdy jalǵastyratynyn jetkizdi.
Sodan keıin «Nur Otan» partıasy Tóraǵasynyń birinshi orynbasary A.Myrzahmetov «Aqbulaq» AQ negizinde qurylǵan bastaýysh partıa uıymynyń múshelerimen kezdesip, uıym jumysyna nazar aýdardy. Sondaı-aq, «Nurly Jol» baǵdarlamasy negizinde «Turǵyn úı qurylys-jınaq» júıesi boıynsha salynyp jatqan turǵyn úıdiń qurylysymen jáne «Aqtóbe jylyjaı» JSHS jumysymen tanysty.

Derekkóz: Egemen Qazaqstan