Memleket basshysy Nursultan Nazarbaev Qazaq­stan Respýblıkasynyń Aza­mattyq prosestik kodeksine qol qoıdy.
Qol qoıý rásimi kezinde sóılegen sózinde Memleket basshysy bul qujattyń búkil el, árbir Qazaqstan azamaty úshin mániniń zor bolýyna baılanys­ty zańǵa qol qoıý tuńǵysh ret jarıa túrde ótkizilip otyrǵanyn atap ótti. Sonymen qatar, Nursultan Nazarbaev osy rásimge BAQ ókilderiniń qatysýy jańa Kodekstiń máni men mańyzyn halyqqa keńinen túsindirýge múmkindik beretinin aıtty jáne Bes ınstıtýttyq reforma men «100 naqty qadam» Ult jos­paryn júzege asyrý úshin 59 jańa zańnamalyq akt qabyldaý qajettigin atap kórsetti. «Kelesi jyldyń 1 qańtarynan reformalardy bastaý úshin el Parlamenti belsene jumys jasaýda. Qazirdiń ózinde 16 zańǵa qol qoıdym, jańa Kodeks sonyń 17-shisi», – dedi Nursultan Nazarbaev.
Osylaı deı kele, Memleket basshysy jańa Azamattyq prosestik kodeks quqyq salasyn túbegeıli jaqsartatynyn jetkizdi. «Jańa Kodeksti qabyldaý zań ústemdigin qamtamasyz etýge aıtarlyqtaı úles qosady. Biz jańa Kodeksti qabyldaý arqyly osy mindetke kirisetin bolamyz. Zańnama aıasynda barlyq zaman­aýı negizgi quqyqtyq ınstıtýttar qam­tyl­ǵan.
Sonymen qatar, bizdiń quqyqtyq jumysymyzdy álemdik ozyq standarttar deńgeıine jet­ki­zetin eleýli ózgerister engizilgen», – dedi Qazaqstan Prezıdenti.
Memleket basshysy Qazaqstan kelesi jyldan bastap bes býyndy sot júıesinen úsh býyndy sot júıesine kóshetinin, munyń isterdi qaraý prosesin jeńildetip, tıimdiligin arttyratynyn jáne qarapaıym azamattarǵa túsinikti ete túsetinin aıtty. Ekinshiden, elimizdiń ınvestısıalyq tar­tymdylyǵyn jaqsartýǵa baǵyt­talǵan ınvestısıalyq daýlardy qaraýdyń, jekemenshik ınstıtýtyn nyǵaıtýdyń jańa tártibi engiziledi eken. Bul aldaǵy ekonomıkalyq ósim úshin mańyzdy bolmaq. Sol arqyly ekonomıkalyq damýǵa sep bolatyn ınvestısıalyq tartymdylyq deńgeıi arta túspek. Úshinshiden, aza­mattyq sot júrgizý isinde aqpa­rattyq tehnologıalardy qoldaný múmkindigi keńeıedi. Osy baǵyt aıasynda sot otyrys­taryn tirkep-kórsetý mindetti bolady, al barlyq tarap onyń jazba kóshirmesin ala alady. Bul jaǵdaı sot jumysynyń ashyqtyǵyn aıtarlyqtaı arttyratyn bolady.
Qol qoıý rásimi aıasynda Qazaqstan Prezıdenti aldaǵy ýaqytta tatýlastyrý jáne daýdy sotqa deıin retteý sharasyn qoldaný aıasy keńeıetinin de jetkizdi. «Tatýlastyrýmen medıatorlar ǵana emes, birinshi jáne apelásıalyq ınstansıa sýdıalary men advokattar da aınalysatyn bolady. Tatýlastyrý sharasyn keńinen qoldaný sot júıesine júktemeni azaıtady, al, eń bastysy, daýdy sheshý merzimin qysqartady. Eger eki taraptyń tatýlasý úderisi júzege asqan bolsa, onda sáıkesinshe, bul iske sottyń qatysýy men azamatty aıyptaý máselesi kún tártibinen alynyp tastalady. Bul – óte mańyzdy. Jalpy, medıasıany damytý azamattardyń qatysý deńgeıin arttyrady», – dedi Nursultan Nazarbaev.
Memleket basshysy mańyzdy jańa ózgerister qatarynda azamattyq-qu­qyq­tyq daý­lar jónindegi sotqa proký­ror­dyń qatysýyn azaıtý, is júrgizýdiń jeńil­detilgen túrin keńinen qoldaný, sottardyń qaraýyndaǵy isterdi ońtaılandyrý, jańa jaǵdaıattarǵa baılanysty isti qaı­ta qaraý tásilin engizý máseleleri qaras­tyrylǵanyna da toqtalyp ótti. «Bul jańa Kodeks normalarynyń barlyǵy sottyń qorǵaýynyń tıimdiligin arttyrýǵa ba­ǵyt­talǵan. Jalpy alǵanda, azamattyq prosestik zańnamany jańǵyrtý jón­inde aýqymdy jumys atqaryldy. Bar­lyq normany ortaq bir júıege kel­tirý úshin ózge de zańnamalyq aktiler boıynsha kóptegen ózgeris qabyldanatyn bolady. Bulardyń barlyǵy azamattardyń sottarǵa degen senimin arttyra túsedi dep oılaımyz. Bul Kodeks soǵan ba­ǵyt­talǵan», – dedi bul týrasynda Qazaqstan Pre­zıdenti.
Sóziniń sońynda Nursultan Nazarbaev rásimge qatysýshylardyń bárin jańa Kodekske qol qoıylýymen quttyqtap, onyń is júzine asýy halyqqa paıdasyn tıgizetinine senim bildirdi.

Derekkóz: Egemen Qazaqstan