Osy aptanyń ishinde Qazaqstannyń ulttyq valútasy AQSH dollaryna degen suranystyń áserinen birtindep quldyraı túsýi múmkin. Bul týraly «Qamshy» portaly Tengrinews.kz-ke silteme jasap habarlaıdy.
"Inflásıa boıynsha osy aptada jarıalanǵan amerıkalyq málimetterge baılanysty asa joǵary qubylmalylyqtyń bolýy da múmkin. Eger kórsetkish baǵa qysymynyń odan arǵy ósimin rastaıtyn bolsa, ol ınvestorlardyń jeltoqsanda mólsherlemeni kóterýge jáne USD pozısıasyn nyǵaıtýǵa jaqsy múmkindik ekenine kózin jetkizedi, ásirese qaterli valútalarǵa qarsy", - dedi Forex Club sarapshysy Alena Afanaseva.
Ol sonymen qatar, teńge baǵamynyń ótken aptada qandaı bolǵanyn aıtty. "Teńge ótken apta boıy AQSH dollaryna qarsy pozısıany ustandy, baǵam 307,73 teńgemen jabyldy. Alaıda búgin qaıta kóterilip 308,36 teńgege jetti", - dedi ol.
Taǵy bir sarapshy Anatolıı Ahmetovtiń túsindirýi boıynsha, ótken apta jergilikti naryq úshin tynysh boldy, shıkizat naryǵynda baǵa tómendep jatsa da, teńge baǵamynyń qubylýy tómen deńgeıde saqtaldy. "Bul jaǵdaı Qazaqstan Ulttyq bankiniń REPO-men kelisim jasasýymen baılanysty bolýy múmkin, baǵamdy retteýdiń mundaı sharasyn biz Reseı Federasıasynyń rýbli tarıhynan kórgen bolatynbyz", - deıdi Ahmetov.
"Alparı" sarapshysy Anna Bodrovanyń aıtýynsha, amerıkalyq dollarǵa qatysty qazaqstandyq valútanyń nyǵaıa túsýi birneshe aptada birinshi ret baıqaldy. "KASE bırjasyndaǵy emosıonaldyq shıelenis gradýsy tómendep kele jatqanǵa uqsaıdy", - dedi maman.
Bodrovanyń málimdeýinshe, baǵam boıynsha jańa aptaǵa arnalǵan boljamǵa asa saq bolý qajet. "Dollar/teńge juby aldaǵy bes saýda kúninde 307,20-310,0 teńge aralyǵynda bolady. Bul jerde asa qatty qubylýshylyqtyń bolý qaýpi bar, "amerıkalyqqa" jahandyq naryqta suranys kóbeıdi. Evro/teńge 328,60-332,00 sheńberinde satylady. Bul jup 2015 jyldyń 6 qarashasynan bastap evrovalútanyń forekstegi álsizdigi esebinen qysqa merzimdi báseńdeıtin arnaǵa tústi. Rúbl/teńge juby 4,10-4,65 sheńberinde saqtalady", - deıdi Anna Bodrova.
Eske sala keteıik, Ulttyq banktiń jáne Ulttyq qordyń altynvalúta aktıvterin saqtaý maqsatynda Ulttyq bank 2015 jylǵy 5 qarashadan bastap óziniń valúta naryǵyna qatysýyn barynsha azaıtý týralysheshim qabyldady. Teńgeniń aıyrbastaý baǵamynyń budan bylaıǵy serpini negizinen álemdik qarjy jáne taýar naryqtaryndaǵy baǵa ahýalynyń serpinimen aıqyndalatyn faktorlardyń áserinen qalyptasatyn bolady.
