Kalachı men Krasnogorskiden 138 otbasy kóshirildi. Bul týraly búgin QR Prezıdenti janyndaǵy OKQ-degi brıfıńte Aqmola oblysynyń ákimi Sergeı Kýlagın málim etti.
Onyń aıtýynsha, Esil aýdanynyń Kalachı aýyly men Krasnogorsk kentinen qolaısyz ekologıalyq jaǵdaıǵa baılanysty memleket tarapynan atalǵan aýyldardyń turǵyndaryn oblystyń ózge óńirlerine kóshirý týraly sheshimge qoldaý kórsetildi.
«Qazirgi ýaqytta, respýblıkalyq búdjet qarajatynyń esebinen 2 úı, atap aıtqanda: Esil q. 45 páterli turǵyn úı jáne Derjavınsk q. 75 páterli turǵyn úı salyndy», - dedi óńir basshysy.
Sonymen qatar ákimniń aıtýynsha, Esil qalasynda 73 páterli turǵyn úıdiń qurylysyn aıaqtaý aǵymdaǵy jyldyń jeltoqsan aıyna josparlanǵan.
«Búgingi kúni, atalǵan eldi mekenderden 138 otbasy kóshirildi. Jumys jalǵastyrylýda», - dedi S.Kýlagın.
