Táýelsizdik kúnimiz ben Jeltoqsan kóterilisiniń qurbandaryn eske alar, 16-17 jeltoqsan jaqyndaǵan saıyn bizdiń elde «daıyndyq jumystary» qyzý bastalady. Kózge kórinip turǵan daıyndyqtar bolmaǵan soń, qandaı daıynyqtar dep oılaıtyn bolarsyzdar. Ol daıyndyq jańa jyl sıaqty merekelik kóńil kúıdegi daıyndyqtar emes, kerisinshe úreı men kúmánnan týǵan saqtyq sharalarynyń daıyndyǵy edi.
Almatyda 7 jyl ákim bolǵan Ahmetjan Esimov myrza kezinde táýelsizdik kúnimiz 6 ret atalyp ótken edi. Sonyń bir de birinde Almatyda bolmaǵan ákim Almaty stýdentterin úıine qaıtaryp jiberip, ózi aýylyna baryp týǵan kúnin toılaıtyn bolǵan. Ony kezekti bir baspasóz máslıhatynda ózi de moıyndady. Jylda 16-17 jeltoqsan kúnderi Almatydaǵy Táýelsizdiń monýmenti men Jeltoqsan qurbandaryna arnalǵan «Táýelsizdik tańy» eskertkishine kelip gúl shoǵyn qoıyp, quran baǵyshtaıtyn 20 adamnyń «qaýipsizdigin» 200 polısıa «qorǵaıdy». Bıyl da Almatyda sondaı kezekti «daıyndyq jumystary» bastalypty. Biraq, Esimovtyń kezindegideı emes.
Keshe keshte Sátbaev pen Jeltoqsan kóshesiniń qılysynda ornalasqan, Jeltoqsan rýhyna arnalǵan «Táýelsizdik tańy» eskertkishiniń qorshaýda turǵanyn kórdim. Kóńilge birden «Esimov myrza Jeltoqsan batyrlaryna quran baǵyshtamady dep júrgende Baýyrjan Báıbek kelip bárimizdi eskertkish mańaıyna jolatpaıyn dedi me?» degen qorqynyshty oı keldi. Táýelsizdik kúni jaqyndaǵanda ne qylǵan jóndeý jumystary, bunyń artynda bir saıası qıturqylyq tur ma degen oıdan ada bolý úshin Almaty qalalyq ishki saıasat bóliminiń basshysy Saıasat Nurbek myrzadan kókeıimdigi suraqtardy qoıyp, «Ol jerde 25 qarashaǵa deıin qalpyna keltirý jumystary júrgiziledi»,- degen jaýap aldym. Sonymen birge, Saıasat Nurbek myrza oziniń feısbýk paraqshasyndaǵy osy týraly jazǵan jazbasynyń siltemesin kórsetti. «2006 j. qyrkúıektiń 18-i kúni Almatyda 1986 jylǵy Jeltoqsan oqıǵasynyń 20 jyldyǵyna arnalǵan «Táýelsizdik tańy» eskertkishi ashylǵan edi. Jeltoqsan oqıǵasynyń 29 jyldyǵyna oraı Jeltoqsan men Sátpaev kósheleriniń qıylysynda ornalasqan «Táýelsizdik tańy» eskertkishiniń qalpyna keltirý jumystary jalǵasýda. Búgin jınalys ótkizip merdigermen osy aıdyń 25-ne deıin bitirýge kelistik»,- dep jazypty S. Nurbek myrza 16 qarasha kúni.
Mine, bul da bolsa Saıasat Nurbek sıaqty ulttyq qundylyqtardy joqtaýshy azamattardyń bılikte bolǵanynyń arqasy. Esterińizde bolsa, Berik Ýálı Ońtúsik Qazaqstan oblysynyń ishki saıasatyn basqaryp turǵan kezinde oblys ákiminiń oblysta táýelsizdik kúni ótpeıinshe jańa jylǵa daıyndyq jumystaryn bastamaý týraly sheshim qabyldaýyna áser etip, qazir «Nur Otandyqtar» sol bastamany búkil Qazaqstanǵa úndeý etip tastap otyr. Saıasat Nurbek myrza da jas ákim Baýyrjan Báıbekke ulttyq qundylyqtardy ulyqtaý jaǵynda óz yqpalyn júrgizip otyrǵan bolsa kerek. Sondyqtan da, resmı bıliktiń ózi qadyrine jetpegen Jeltoqsan kóterilisin ulyqtap, qurbandarǵa taǵzym retinde eskertkishke jónde jumystaryn jasap jatsa kerek. Endi, bergilengen ýaqytta jóndeý jumystary sátti aıaqtalsyn dep tileıik.
Resmı bıliktiń ózi qadirine jetpeı otyr degenim, 17 jeltoqsandy Qazaqstannyń demokratıalyq jańarý kúni dep maımóńkelemeı, Jeltoqsan kóterilisin eske alý kúni dep ataý kerek edi. Biraq, Jeltoqsann kóterilisiniń 29 jyldyǵyn da demokratıalyq jańarý kúni dep atap ótkeli otyrmyz. Qudaı qalasa, shyrshanyń orynyna eskertkishterdi túgendep júrgen jigitter joǵary bılikke barǵanda, 17 jeltoqsandy Jeltoqsan kóterilisin eske alý kúni dep ashyq ataıtyn bolarmyz.
Turdybek Qurmethan
Pikir qaldyrý