Qazaqstandyq arý Regına Vandysheva Qytaıda ótetin «Álem arýy-2015» sulýlyq baıqaýyna qyzý daıyndyq ústinde. Bul týraly «Qamshy» portaly QazAqparatqa silteme jasap habarlaıdy.

«Men úshin elimdi halyqaralyq dodada tanystyrý úlken mártebe. Qazir sporttyq saıysqa, defılege, ulttyq kıim baıqaýyna daıyndyqqa barynsha kirisip jatyrmyn. Uıymdastyrýshylar bir aı boıy qatysýshylardy qatań baqylaıtyn bolady», - dedi ol. 

Qazaqstannyń eń ádemi arýy shyǵarmashylyq baıqaýǵa daıyndap jatqan nómiri týraly aıtyp berdi. 

«Kontemporarı stılinde bı daıyndap jatyrmyn. Qazir sheberligimdi shyńdaı túsý úshin jattyǵý zalynda, kros-fıt, fıtnes zalda daıyndalyp júrmin. Ózimniń demeýshim Sherri Hill kıimderin kıemin. Biraq ulttyq naqyshta dızaıner Aıda Qaýmenovanyń tikken kóılegimen shyǵamyn»,- dedi ol.
Jaqynda ǵalamtorda Regınanyń álemdik dodaǵa daıyndyǵy týraly beınetanystyrylymy jaryq kórdi. Beınerolıkte Regına Qazaqstannyń kórkem jerlerin tanystyryp, óziniń bolashaqqa degen josparymen bólisti.
«Álem arýy-2015» baıqaýy Qytaıdyń Haınan aralynda 19 jeltoqsanda ótedi.