Keshe keshke Shyǵys Qazaqstan oblysy Rıdder qalalyq soty 26 jastaǵy bloger Igor Sychevti "separatızmge shaqyrǵany úshin" bes jylǵa sottady. Túrmege kesilgen Sychev aıypty moıyndamady. Bul týraly «Qamshy» portaly Azattyqqa silteme jasap habarlaıdy.
– Úkimge qatysty appelásıalyq sotqa mindetti túrde shaǵymdanamyz, – dep málimdedi sottalǵan blogerdiń advokaty Igor Shıgrın.
Igor Sychev tergeý kezinde jáne sot prosesinde, onyń ishinde búgin tańerteń taraptar jaryssózinde sóılegende jáne ózine sońǵy sóz bergende taǵylǵan aıypty moıyndamaıtynyn málimdegen.
Taraptar jaryssózin bastaǵan prokýror sottan I. Sychevti bes jylǵa sottaýdy surady. Qyrymdy Reseı quramyna bólip alǵannan keıingi Ýkraınadaǵy jaǵdaıǵa silteme jasaǵan prokýror I. Sychev «kóbinese orys halqy turatyn aımaqta» separatıstik kóńil-kúı týdyrýǵa tyrysqan áreketterge qasaqana barǵan dep málimdedi.
I. Sychev isine qatysty proses barysyn baqylaǵan jergilikti quqyq qorǵaýshy Aleksandr Harlamovtyń Azattyqqa aıtýynsha, blogerdiń soty Rıdderde úlken rezonans týdyrǵan.
– Igor Sychevti qoldaý úshin sotqa óte kóp adam keldi, – deıdi Aleksandr Harlamov.
Igor Sychev reseılik «VKontakte» áleýmettik jelisindegi «Podslýshano v Rıddere» paraqshasy admınıstratorlarynyń biri bolǵan. Bıyl kóktemde ol top paraqshasynda «Daýysqa salý Rıdder qalasynda ótip jatyr dep elestetip kóreıikshi» degen taqyryppen saýalnama jarıalap, oqyrmandarǵa Shyǵys Qazaqstan oblysyn Reseı federasıasy quramyna qosýdy «qoldaımyn» nemese «qarsymyn» dep jaýap berýdi usynǵan. Jurt narazylyq bildirgen soń ol álgi daýys berýdi alyp tastaǵan. Keıin Sychevke aıyp taǵylǵan.
Jergilikti quqyq qorǵaýshylardyń pikirinshe, bloger Igor Sychevtiń sot prosesi belsendilerge qarsy «buryn-sońdy bolmaǵan repressıalar» kezeńi tusynda ótip otyr. Búgin Astana soty «BAQ arqyly áleýmettik jáne ulttyq arazdyqty qozdyrýǵa baǵyttalǵan» áreketterdi qasaqana jasady degen kúdikpen 9 qarashada ustalǵan 42 jastaǵy azamattyq belsendi Bolatbek Bilálovti tergeý abaqtysynda qamaýda qaldyrýdy uıǵarǵan sheshim shyǵardy. Almatyda Reseıge qarsy pozısıasymen tanylǵan azamattyq belsendiler Ermek Narymbaev pen Serikjan Mámbetálın «ultaralyq arazdyqty qozdyrý» isi boıynsha tergelip jatyr. Jambyl oblysynda reseıshil kózqarastarymen tanylǵan bloger Ermek Taıshybekovtyń soty ótip jatyr. Oǵan «ultaralyq óshpendilikti qozdyrdy» degen aıyp taǵylǵan.
