«Tamshy» ǵylym jáne mádenıet qory men Ǵ. Músirepov atyndaǵy Qazaq Akademıalyq balalar men jasóspirimder teatry Qazaq handyǵynyń 550 jyldyǵyna arnalǵan «Tarıhyn tasqa tańbalaǵan – QAZAQ ELİ» atty merekelik shara ótkizedi, - dep habarlaıdy «Qamshy» portaly teatrdyń baspasóz qyzmetine silteme jasap.  

Elbasy Nursultan Nazarbaev Qazaqstan halqyna arnaǵan Joldaýynda «2015 jyl – ulttyq tarıhymyzdy ulyqtaý jáne búgingi bıikterimizdi baǵalaý turǵysynan mereıli belester jyly. Qazaq handyǵynyń 550 jyldyǵyn, Qazaqstan halqy Assambleıasy men Konstıtýsıamyzdyń 20 jyldyǵyn, Uly Jeńistiń 70 jyldyǵyn atap ótemiz» dep atap kórsetken bolatyn. Osyǵan oraı, josparlanyp otyrǵan sharanyń negizgi maqsaty – san ǵasyrlyq tarıhymyzdy, babalarymyz salǵan sara joldy dáripteý, halyqty yntymaq-birlikke jumyldyrýǵa at salysý bolyp tabylady. Uly dalany dúbirge bólep, jalpy halyqtyq sıpat alǵan merekeniń keń nasıhattalýyna úles qosý.

Josparlanyp otyrǵan merekelik baǵdarlamada ulttyq salt-dástúrimiz ben tarıhymyzdy jáne otanshyldyqty dáripteıtin arnaıy teatrlandyrylǵan qoıylymdar, dástúrli án-kúılerimiz ben ulttyq bılerimiz oryndalady. Elimizge tanymal estrada juldyzdary óner kórsetedi. Sonymen qatar, ulttyq qol óner buıymdary, kıim úlgileri, ulttyq naqyshtaǵy zamanaýı tehnıkalyq quraldar, t.b. týyndylar kórmege qoıylady.