Ony el «Sarybas», «Altyn bas» dep te ataıdy. Tamasha talantymen «Qazaqstan daýysy» baıqaýynda jurtty tań qaldyryp, kóptiń kózaıymy boldy. Ol – Muratbek Haırolda. Nazarlaryńyzǵa jas ánshimen bolǵan shaǵyn suhbatty usynamyz.
- Áýeli júldeńiz qutty bolsyn! «Qazaqstan daýysy» jeńimpazy ataǵymen qosa 5 mıllıon materıaldyq marapatqa ıe bolyp jatyrsyz? Mynaý daǵdarys zamanynda qandaı qajetke jaratýdy oılap otyrsyz?
- İzgi tilegińizge kóp rahmet! Amandyq bolsa «5 mıllıondy» qolyma tıgennen-aq kómek qorlaryna berýdi, operasıaǵa kiretin balalarǵa, jetimder úıine kómektesýdi nıet etip otyrmyn. Sebebi, ár azamat qazaqtyń qamqorlyqqa muqtaj balalaryna kómek qolyn sozatyn bolsa, sol kómekten balalar baqytqa kenelse, bundaı istiń saýaby kez kelgen jeńimpazdyq ataqtan álde qaıda artyq. Allanyń bergen osyndaı baqytyna kishkene bolsa da ózgelerge kómegim arqyly rahmetimdi, shúkirimdi aıtqym keledi.
Árıne, bul deńgeıde qalyp qoımaı ónerimdi ary qaraı jetildire túsýge de tıistimin. Bir baıqaýdaǵy jeńiske mastanyp, toqtap qalýǵa bolmaıdy.
- Aldaǵy shyǵarmashylyq josparlaryńyz týraly da aıta ketseńiz.
– Josparymyz árıne, ónerge qadam basqannan keıin, osy jeńisti maǵan syılaǵan jaqyndaryma, týystaryma, dostaryma, qoldaǵan halyqqa jaqsy ánder men beınebaıan syılaý. Osy deńgeıde qalyp qoımaı jetile berý, ónerdi shyńdaý. Shynaıy qoldaýshylary, talǵamdy tyńdarmany kóp ánshiler qatarynan tabyla bilsem, meni ardaqtaǵan jaqyndarymnyń da, meniń de baqytym sol emes pe?!
- Siz Qazaqstannyń óner álemine jańa kelip, jarq etip top jardyńyz, oqyrmanǵa ózińiz týraly da málimet bere ketseńiz?
- Men 1990 jyly, 28 shildede Monǵolıanyń baı ólkesi Baıan-Ólgıı qalasynda ómirge kelippin. Ata-anam sol jyly Atajurtqa qonys aýdarypty. Aqmola oblysynyń Stepnogorsk qalasyna besigimde kelip, sonda erjettim. Bilim aldym. Ónerge jaqyn bolǵasyn, osy baǵytqa beıimdeldim.
Qazir Astanadaǵy Qazaq ulttyq óner ýnıversıtetiniń estrada bóliminde, 3 kýrs stýdentimin.
- Sheteldiń shoý-bıznes ókilderi kóbinde óz elimen shektelmeı, barsha álemge hıt bolatyn ánder jazyp, jalpaq álemge tanylyp jatady. Elimizdiń eń tańdaýly jobasyna jeńimpaz bolyp jatsyń, álem sahnasyna umtylýdy oıladyńyz ba?
- Árıne, bul ár ónerde júrgen azamattyń armany bolar. Ónerge aıaq basqan kez-kelgen talant ıesi men talaptynyń armany sondaı deńgeıge jetý. Ózge eldiń de óner ıelerimen ıyq tirestirý. Qazaqstannyń eńsesin kóterý, kók baıraqty jelbiretip, qazaqtyń atyn shyǵarý meniń de armanym. Men buǵan deıin halyqaralyq baıqaýlarǵa shyǵyp júrdim. Túrkıada ótken, Ýkraınada, Reseıde ótken baıqaýlarǵa qatystym. Qatysqan baıqaýlarymda bas júldege ıe bolyp, jeńispen oralyp júrdim. Shúkir!
Qazaqstanda ótken patrıottyq ánder baıqaýynda, kompozıtorlardyń án básekelerinde bas júldeler alyp júrdim. Árıne, bulardyń bári úlken jeńiske jeter joldaǵy tájirıbe men synaqtar. Osyndaı joldan qanatymyz qataıyp, tuıaǵymyz súrinbeı óte bersek, alar asýlarymyz qıyn bolmas.
- Ónerde kimderge elikteısiz? Kimderdi úlgi tutasyz?
- Óner jolynda júrgen ár kimniń de óz bıigi bar, óz ónegesi bar, ózindik orny bar. Sondyqtan da óner jolyndaǵy barsha aǵa-ápkelerdi, baýyrlarymdy jaqsy tyńdaımyn, syılaımyn, joǵary baǵalaımyn. Alalap, bólip jarǵan emespin. Halyqtyń júreginen ábden oryn alǵan Roza Rymbaeva, Medeý Arynbaev, Nurlan Alban, Jubanysh Jeksenuly sıaqty ánshilerdi ózime úlgi tutamyn. «Qaraǵaıǵa qarap tal óser, Ataǵa qarap bala óser» deıdi ǵoı qazaq. Aldyńǵy býyn ánshilerdiń bárin de úlgi ótemiz.
- Ózińiz júldesin ıelendińiz ǵoı, árıne. Deı turǵanmen qatarynan úsh jyl boıy elimizdiń eń úlken telearnasynda bolyp jatqan «Qazaqstan daýysy» jobasyna ishteı bergen baǵańyz bar ma? Bul jobany qanshalyqty ádil sanaısyz?
- Bul joba halyqqa usynylǵanynan-aq kóptegen sózge qalyp, synǵa ushyrady. Jaqsy sóz de, aýyr syn da aıtyldy. Tipti, «Ár tálimgerdiń kreslosy burylǵanynyń ózi aqsha eken» degen qaýesetter tarady. Biraq, men dál osy jobada qandaı da bir qarjylyq talaptar, qaǵajý men qaqpaılaý kórgen joqpyn. Kózimizben kórdik, shynymen ádil joba. Halyqtyń ózi baǵalaıdy.
Eger jyl saıyn qaıtalanyp jatqan bolsa, kórermenniń de qajetsingen, jaqsy baǵasyn alǵan joba bolǵany. Qazirgi tilmen aıtqanda, reıtıńisi joǵary, kórermen suranysyna ıe baǵdarlama bolǵandyqtan jalǵasyn taýyp keledi.
- Osy jobada áttegen-aı degen nemese kóńiliń qalǵan jaılar boldy ma?
- Osy jobadan keıin keıbir jurt «bilmeı qalyptyq, mynaý monǵol eken, oralman eken» dep sýyq sóz, qysyr áńgime aıtyp, pikir bildirip jatty. Fınaldyq básekege shyqqan Jánnat ta Qytaıdan kelgen qandasymyz edi. Bundaı alalaý, árıne, meniń kóńilimdi muzdatty, janymdy kúıdirdi. Qazaqtyń urpaǵy qaıda týylsa da, olardyń qanynda týlaıtyn birdeı qan. Alalaýdyń ornyna alqaý bolsa, bólip jarýdyń ornyna birligimiz bolsa degen oıym bar. Degenmen de, qoldap-qolpashtaǵan kisilerdiń, kóptiń tileýiniń janynda mundaı jaǵdaılar tez umytylyp ketedi ǵoı.
- Baıqaýdyń jeńimpazy retinde, mereke qarsańynda elge degen tilegińizdi bilsek.
- Iá, bul baıqaýdyń jeńimpazy atanýym jalǵyz meniń eńbegim nemese ǵaıyptan qona salǵan baq emes. Bul eldiń qoldaýy, talmaı jattyǵýlar, ári tárbıeshim bolǵan Nurlan aǵanyń nusqaǵan joly. Sondyqtan da eń aldymen sol kisige úlken alǵysymdy aıtamyn! Daýys bergen, bıik shyńǵa, mártebege laıyq kórgen barsha qazaqstandyqtarǵa zor alǵysymdy bildiremin! Otandastarymnyń barshasyna tek jaqsylyq, otbasylaryna bereke-birlik tileımin! Mereke qarsańynda bárińizdiń shańyraqtaryńyzda shattyqqa toly kóńil-kúı, jańa jylda jańa tabystar, joǵary jetistikter bolsyn deımin. Elimiz aman jurtymyz tynysh bolsyn!
- Tilegińizge rahmet! Sizdiń de merekeńiz qutty bolsyn!
Suhbattasqan: Erlan Tóleýbaı
