Jeltoqsan aıy bastalysymen el aýmaǵynda Jańa jyl merekesine daıyndyq bastalyp ketedi. Tipti, qyzdy-qyzdymen Bas memlekettik mereke Táýelsizdik kúni memlekettik organdar tarapynan tasada qalyp jatatyn kezder de az emes. Bıyl da birqatar qoǵam belsendileri Táýelsizdik merekesinen buryn Jańa jylǵa daıyndyqty bastamaý týraly usynys tastaǵanymen, bul bastama sol usynys kúıinde qaldy. 1 jeltoqsan kúni Astanadan bastap, elimizdiń barlyq aımaqtarynda jańa jyldyq shyrshalar jaǵyldy. Osy kún Jańa jyl merekesine daıyndyq sharalaryn bastap berdi. Sodan beri Qazaqstan boıynsha shyrsha tigý, jańa jyldyq keshter uıymdastyrýdan jarys bastalyp ketkendeı kúıdemiz. Aqparat quraldary jańa jyldyq is-sharalardy jappaı jazýda. Budan jergilikti ákimderdiń baspasóz hatshylary da qalysar emes. Áleýmettik jeliler «Ana ákim anaǵan mynadaı syı jasapty», «Mynda Aıaz ataǵa hat jazǵan bala qýanyshqa keneldi», «Pálen kásipker túglen aqshaǵa qalaǵa alyp shyrsha syılady», «Balalardy Prezıdent vıdeojoldaý arqyly quttyqtady», «Pálenbaı mıllıonǵa muzdy qalashyq turǵyzyldy» degen saryndaǵy jazbalarǵa tolyp ketti. Munyń barlyǵy kópshilikke merekelik kóńil kúı syılaǵannan buryn, daǵdarys dep daǵdarǵan zamanda jelge ushqan qyrýar qarjy úshin qaıǵy shektirýde.
Osy oraıda Qazaqstannyń ár óńirindegi jańa jyl merekesine daıyndyq deńgeıine 7kun.kz zertteý jasapty. Saıt tilshileri oblystyq jáne qalalyq ákimdikterdiń baspasóz hatshylaryna habarlasyp, merekege daıyndyq týraly, búdjetten qanshalyqty qarjy qarastyrylǵany jaıly aqparat jınaqtapty. Bul merekeni atap ótýge keı óńirler birneshe mıllıon bólse, ózgelerdiń búdjetinde Jańa jyldy toılaýǵa qarjy qarastyrylmaǵan eken. Aıta keterligi, oblys tarapynan qarjy bolmaǵanymen, ortalyq qalany bezendirý úshin aqsha bólinedi. Daǵdarystyń salqynyna baılanysty, bezendirýge bólingen qarjy eski áshekeılerdi qaıta jóndeýden ótkizýge jumsaldy. Qala kóshelerin sándeýdi jeke kásipkerler óz moıyndaryna alǵan.
Eski jyldy shyǵaryp salýǵa kóp qarjy jumsaǵandardyń biri — Pavlodar oblysy. Óńir boıynsha merekelik bezendirý, shyrsha ornatý jáne múmkindigi shekteýli, jaǵdaıy tómen balalarǵa syılyq jasaý úshin 52 mln 425 myń teńge jumsaldy. Pavlodar qalasyn bezendirý úshin 41 mln teńge berilgen.
Mańǵystaý oblysy boıynsha Jańa jyl merekesine bıyl barlyǵy 45 mln 726 myń teńge bólindi. Onyń ishinde bezendirýge 31 mln 23 myń teńge, al kópshilik mádenı is-sharalarǵa 14 mln 703 myń teńge jumsalady. Aqtaý qalasy boıynsha barlyǵy 28 mln 465 myń teńge berildi. Onyń ishinde bezendirýge 18 mln 465 myń teńge, al kópshilik mádenı is-sharalarǵa 10 mln teńge qarjy bólingen.
Almaty qalasyn bezendirýge jáne Jańa jyldyq shyrshaǵa 50 mln teńge qarajat bólindi. Aloblys ortalyǵy Taldyqorǵanda ortalyq alańdy jáne qalany bezendirýge 10 mln teńgege jýyq qarjy jumsaldy. Qala ortalyǵyna ornatylǵan 21 metrlik shyrsha osydan 3 jyl buryn satyp alynǵan.
Soltústik Qazaqstan oblysynda Jańa jylǵa dep oblystyq búdjetten 23 mln teńge bólingen. Onyń 21 mln teńgesi Petropavlsk qalasyna jumsalady. 2 mln teńge ózge aýdandarǵa jiberiledi.
Al Batys Qazaqstan oblysynyń ortayǵy Oral qalasynda Jańa jyldy merekeleý úshin 2 mln teńge bólingen. Uıymdastyrý jumystary úshin tender júrgizilgen joq, jaýapty — Oral qalasynyń mádenıet jáne tilderdi damytý bólimi. Bezendirý kezinde ótken jylǵy qurylǵylar paıdalynylǵan.
Jambyl oblysy boıynsha Jańa jyl merekesin atap ótýge búdjet bólinbegen. Al oblys ortalyǵy Taraz qalasyn bezendirýge 1 mln teńge jumsaldy.
Ońtústik Qazaqstan oblysyna Jańa jyl úshin búdjetten qarjy qarastyrylmaǵan. AlShymkent qalasyna bólingen 80 mln teńge jetim jáne az qamtylǵan balalar úshin jumsalady. Qala ishi jeke kásipkerler arqyly bezendirilip jatyr.
Qostanaı qalasy ákimdiginiń tarapynan Jańa jyldy merekeleýge, onyń ishinde qalany bezendirýge arnaıy qarjy bólinbedi. Baspasóz qyzmetiniń habaralaýynsha, jyl saıyn memlekettik merekeler úshin qarjy bólinedi. Bıylǵy soma — 40 mln teńge. Onyń ishinde 15 mln teńge Tuńǵysh Prezıdent kúnine, Táýelsizdik kúnine jáne Jańa jylǵa qalany bezendirýge jumsaldy. Oblystyq búdjetten qarjy bólinbeıdi.
Atyraý oblysynyń baspasóz qyzmeti de merekeni toılaý úshin oblystyq búdjetten qarjy bólinbegendigin habarlady. Merekeni atap ótý úshin arnaıy shara uıymdastyrylmaǵan. Oblystyq ákimshilik korporatıvti kesh ótkizbeıdi.
Qaraǵandy oblysy da «búdjet qarajatyn qatań únemdeý jáne tıimdi paıdalaný maqsatynda» jańa jyl merekesin atap ótýge qarjy bólingen joq. Qaraǵandy qalasyn bezendirýge de aqsha qarastyrylǵan joq. Tek ótken áshekeıler paıdalanylǵan. Ákimdik baspasóz qyzmetiniń habarlaýynsha, korporatıvtik kesh te ótkizilmeıdi. Dál osylaı Qyzylorda oblysy da Jańa jyldyq merekeni toılaýǵa búdjetten qarjy qarastyrmaǵan.
