KASE tańǵy sesıasynda dollar 362,62 teńgege teń boldy, - dep habarlaıdy Tengrinews.kz tilshisi. Aıta keteıik, shetel valútasy 30 jeltoqsannan beri qymbattap jatyr.

12 qańtarda tańǵy sesıadaǵy alǵashqy kelisim 359 teńgemen bastaldy. Saýdadaǵy eń tómengi baǵa 358,5 teńge boldy. Eń joǵarysy 367 teńgege deıin jetti. Sesıa kezinde saýda kólemi 82,9 mıllıon dollardan asty. Aqsha aıyrbastaý oryndary bolsa dollardy 365-368 teńge aralyǵynda satyp jatyr.

Eske sala keteıik, dúısenbi, 11 qańtarda Brent munaı markasy 2004 jyldyń sáýirinen beri 32 dollarǵa, al WTI markaly munaıy 5 paıyzdan asa arzandaǵan. Máskeý ýaqyty boıynsha, 20.30 jaǵdaıynda soltústik teńiz Brent munaı markasynyń naýryz fúchersteriniń quny 6,01 paıyzǵa - barreline 31,89 dollarǵa deıin tústi. WTI markaly munaıdyń aqpan aıyndaǵy fúchersteriniń quny 5,37 paıyzǵa tústi, ıaǵnı barreli úshin 31,38 dollarǵa teń.