Qyzylorda qalasyndadaǵy emhanalardyń jumysy turǵyndardyń narazylyǵyn týdyrýda. Basy aýyryp, baltyry syzdap kelgender dárigerlerge kire almaı, uzyn-sonar kezekten ábden mezi bolǵandaryn aıtýda, - dep habarlaıdy «Qamshy» portaly.

Turǵyndardyń aıtýynsha, qalanyń «KBI» yqsham aýdanynda ornalasqan emhanada júkti áıelderge keńes beretin, olardyń densaýlyǵyn qadaǵalaıtyn bir de-bir dáriger joq kórinedi. Tipti, tapsyrylǵan analız qorytyndylary aýmaqtyq emes, №6 emhanadan shyǵarylatynǵa uqsaıdy. Al, ol analızderdiń qorytyndylaryn alý úshin emdelýshiler saǵattap kezekte turady.

Ashynǵan turǵyndar qala basshylyǵynan «KBI» yqsham aýdanyndaǵy emhanany jaýyp tastaýdy, №6 emhananyń dárigerleriniń qyzmetine shalaǵaılyqpen qaramaýyn talap etýde.

Medısına salasyndaǵy mundaı olqylyqty «Feısbýk» áleýmettik jelisinde Ońǵar Saımosaev esimdi azamat beınejazba túrinde kópshilikke jarıalady. Jazba ıesi «Bul máselege Qyzylorda oblystyq densaýlyq saqtaý basqarmasynyń basshylyǵy ne aıtar eken?» dep saýalyn da joldaǵan.

Eki ýchastoktyń turǵyndaryna qyzmet kórsetip otyrǵan emhananyń kelýshileri kóp. Sonyń saldarynan kezekke turǵandardyń qarasy kóbeıip ketetin kórinedi. Tańsáride kezekke turǵandar, dárigerdiń aldyna túske taıaý bir-aq jetetinin aıtyp shaǵymdanýda.