Búgin Májilis depýtattary palatany merziminen buryn taratýdy Memleket basshysy Nursultan Nazarbaevtan surady. Olardyń oıynsha, kezekten tys Májilis saılaýyn ótkizýge halyqaralyq daǵdarys sebep bolǵan kórinedi. Naqtyraq aıtsaq atalǵan saılaýdan keıin «taǵaıyndalǵan» depýtattar Qazaq elin daǵdarystan qutqaryp, ekonomıkalyq jaǵdaıyn jaqsarytyp beredi eken.  Alaıda, shyn mánisinde daǵdarystan shyǵyp, ekonomıkalyq ál-aýqatymyzdyń artýyna bul saılaýdyń qanshalyqty paıdasy bar?

Sonymen, ne kerek Parlamenttegi úsh partıa men Qazaqstan halqy assambleıasy atynan saılanǵan depýtattar meriziminen buryn saılaý ótkizýge qulshynyp otyr. Árıne, buǵan deıin «bir aýyzdy» ári «uıymshyl» bolyp kele jatqan májilismenderdiń ótinishterin prezıdent keri qaıtara qoımas. Óıtkeni, «Kezekten tys Májilis saılaýy ótedi» degen aqparat shyǵa sala, Úkimet saılaýǵa 4 mlrd. teńge bóletinin jarıalady. Alaıda, bilikti sarapshylardan bastap saıasattan az ǵana habary bar azamattarǵa deıin «bul saılaýdan eshqandaı paıda joq» degen pikirde. Sebebi, qazirgi depýtattardyń 80 paıyzy qaıtadan Parlament tórine orlady. Sondyqtan da budan eshqandaı da paıda joq.

Alaıda, bizdiń paıymdaýymyzsha bıylǵy kezekten tys Májilis saılaýynyń eń basty «jańalyǵy» Parlamentke «Aýyl» partıasynyń ótetini bolsa kerek. Óıtkeni, sońǵy kezderi atalǵan partıasynyń belsendiligi buǵan deıingi kezeńdermen salystyrǵanda artyp otyr. Máselen, «aýyldyqtar» jaqynda  ózderiniń resmı saıtynyń tusaýyn kesti. Sondaı-aq, úkimettiń yqpalyndaǵy buqaralyq aqaparat quraldary «Aýyldyń» shashpaýyn kóterýde. Onyń ústine partıa tóraǵasy Álı Bektaev Parlament tórinde senator bolyp otyr. Demek, keler saılaýda «Aýyldyń» asyǵy alshysynan túsip, Májilis tórinen oryn alýy múmkin.

Desek te, Parlament Májilisine «Aýyl» partıasynyń ótetini nemese ótpeıtini basty jańalyq emes. Shyn mánisinde basty jańalyq qazaq ultshyldarynyń Májilis depýtaty bolyp, ózekti máselelerdi Parlament tórinde kótergeni bolyp tur. Ótken apatada biz bul týraly saıtymyzda «Ultshyldar otyrmaǵan Parlamentten paıda joq» degen taqyrypta maqala jazǵan bolatynbyz. Naqtyraq aıtsaq, Parlamentke Aıdos Sarym, Muhtar Taıjan, Murat Ábenov, Rasýl Jumaly syndy ulttyq-demokratıalyq ustanymdaǵy azamattar ótse, nur ústine nur bolar edi. Alaıda, bılikke aıtqanyna kónip, aıdaǵanyna júretin depýtattar kerek. Sondyqtan da qarasha halyqtyń izgi armanynyń júzege asa qoıatynyna senim joq.

Áıtse de, Jarmahan Tuıaqbaı basqaratyn Jalpyulttyq sosıal-demokratıalyq partıasy arqyly ultshyldardyń Parlamentke ótýine múmkindik bar. Óıtkeni, atalǵan partıanyń basshysy kópten bergi úzilisten keıin búgin arnaıy málimdeme jasap otyr. Negizinde Jarmahan Tuıaqbaıdyń ulttyq múddeni tý etip dál saılaýdyń aldynda málimdeme jasaýy tegin emes. Óıtkeni, atalǵan málimdemege qaraǵanda partıa aldaǵy saılaýǵa qatysýǵa dámeli sıaqty. Alaıda buqara halyqtyń arasynda partıanyń bedeli óte tómen. Eger Jalpyulttyq sosıal-demokratıalyq partıasy ultshyldardy óz qataryna tartyp, áreket etetin bolsa saılaýda yqpaldy kúshke aınalýy múmkin. Uzyn sózdiń qysqasy Jarmahan Tuıaqbaı basqaratyn partıanyń taǵdyry ultshyldardyń qolynda turǵan sıaqty. Alaıda, «Rýhanıat» partıasynda jibergen qateligin bılik qaıtalamaıtyn shyǵar.

Serik JOLDASBAI

Astana