Parlament Senatynyń keshegi otyrysynda palata tóraǵasy oǵash qylyq tanytty. Depýtattarǵa Halyqaralyq konvensıalarǵa saı bilim salasyndaǵy ózgeristerdi tanystyrýǵa kelgen Bilim jáne ǵylym mınıstri Aslan Sárinjipovten qazaqsha sóıleýin suraǵan senator Sársenbaı Eńsegenovtiń eńsesin Senat tóraǵasynyń ózi-aq túsirip tastady. Ol týraly vıdeony myna siltemeden kóre alasyzdar.

«Sizdiń  memlekettik tilde baıandama jasaýyńyz  sırep barady, joq dep aıtýǵa bolady. Muny eskerý kerek» degen senator sózine shamdanǵan Qasym-Jomart Toqaev mınıstrge arasha túsip, saýal qoıǵan depýtattyń ózine zekidi.

«Depýtat Eńsegenov, zańǵa baılanysty suraq qoıý kerek. Sizdiń suraǵyńyzdyń zańǵa eshqandaı baılanysy joq», - degen Q. Toqaevtyń jaýaby tildiń jaıyn suraǵan senatordy birden sabasyna túsirdi. Tipti, ol saýal qoıý kezinde shatysyp ketkenin aıtyp, palata tóraǵasynan keshirim surady.

Osylaısha qazaq bıligindegi Konstıtýsıa boıynsha ekinshi laýazymdy tulǵa memlekettik tildiń máselesi zańǵa qatysy joq dep, qazaq tilinde baıandama jasaýdy qajet sanamaǵan mınıstrge syn aıtqan senatordy tuqyrtyp tastady. Qazaq tilinde ózi áreń sóıleıtin Q. Toqaev bul qylyǵymen halyqty ózine, tipti, tutastaı bılik júıesine qarsy qoıyp alýy bek múmkin.