Sońǵy 7-8 jyl shamasynda qazaq estradasynda erekshe tanymaldyqqa ıe bolyp, ónerimen kópti tánti etken Qaırat Nurtas sońǵy ýaqytta qazaqy tárbıe kórgen jasqa tán emes jat qylyqtar tanytýda. Muny biz Qaırattyń ǵalamtordy sharlap júrgen túrli otyrystardaǵy «qyzyqtary» jazylǵan vıdeolarǵa qatysty aıtyp otyrǵanymyz joq.

Jeltoqsan aıynda Astana men Almatyda dúrkiretip konsert ótkizgen ánshimiz oǵan Reseıden arnaıy baryp, Tımatı men Núsha degen eki ánshini aldyrtty. Ras, qazaq jastarynyń arasynda bulardy tyńdaıtyndar, tipti, ónerine tabynatyndar jetip artylady. Biraq, elimizde katolık dinin ustanatyndar bar eken dep kúnde Rım papasyn qonaq ete almaıtynymyz sıaqty, ulttyq tanymymyzǵa jat osy bireýlerdi shaqyrmasa da Qaırattyń konserti ótpeı qalmas edi ǵoı. Onymen qoımaı, aqparat quraldary «Qaırat konsertine kelgen reseılik ánshilerge 89 mıllıon teńge aqsha tólepti», - degendi jarysa jazdy. Bul da ánshige degen sońǵy úmiti sónbegen tyńdarmannyń kóńiline qaıaý túsirgeni anyq.

Al, «…Ia voobshe ne mestnyı.
Da, ı bez propıskı.
Ný, a che krasaýchık, mená lúbát kıskı,
101 roza, popolnáá spıskı, o kakaıa j..a,

Kakıe s..kı, slysh daı-ka nomerok bystro...», - degen sıaqty dóreki mátinderdi án etip aıtyp júrgen Tımatıdeı ánshiler keıbir shala saýat qazaqtarǵa bolmasa, bylaıǵy jurtqa esh qyzyq emes. Muny bir bilse, Qaırat bilýi tıis edi. Alaıda, olaı bolmady. «Men birinshi bolyp Tımatıdy aldyrttym, Núsha meniń konsertime arnaıy keldi» degen maqtan qymbat bolǵan syńaıly bárinen.

Hosh. Bolǵan is boldy. Tımatı ketti. İs bitti. Tyńdarmandarymen baılanys ustaıtyn, olardyń arasyndaǵy pikir aýanyn zerdeleıtin ánshi bolsa,  budan keıingi jerde aıaǵyn ańdyp basar edi ǵoı. Olaı da bolmady. Taǵy da dańǵazalyqqa, daraqylyqqa saldy. Basqa aınalysar túgi joqtaı, qańtardyń aıazynda Qostanaıǵa baryp, hrıstıan jamaǵatymen birge «Shoqyný meıramynda» sýǵa tústi. Ony taǵy da «Meni kórdińder me?» degendeı ǵalamtorǵa jarıalady. Buny da bos daraqylyq degennen basqasha baǵalaı almaısyz. Qansha jerden Reseı ánshilerine aqsha tólep, birer aýyz án aıttyrsyn, qansha jerden solardyń meıramyn toılasyn, tipti, shoqynyp ketse de orystar Qaıratty kerek te qylmaıdy. Shymkentshe aıtqanda, qansha jerden «jyrtylsa da», olar úshin kóp «Chýrkanyń» biri bop qala beredi. Qaıratqa deıin de talaı ánshi Reseı jaqqa qarap yńyldaǵan. Qanshasy Máskeý, Peterbor baryp, sińise almaı qaıtyp kelgen. Endigiler de sóıtedi.

Qalaı bolǵanda da óz balamyzdyń bulaı adasýy jón emes. Sezimniń názik qylyn shertetin oıly ándermen kóptiń júregin jaýlaǵan erekshe daryn ıesiniń kóz aldymyzda bulaı jeksuryn keıipke enip bara jatqany janymyzǵa batady. Áli de kesh emes, ánshi ótken-ketkendi salmaqtap, aınalasymen aqyldasyp, tyńdaýshylarynyń pikirine qulaq túrip oı túıedi degen senimdemiz.

Aıgúl Saparhanqyzy

Shymkent