«Qytaı tilin bilmeıtin hám jetik meńgermegen jumysshylar óz qyzmetterinde joǵarylaý múmkindiginen aıyrylyp otyr. Tipten, kompanıadan shyǵyp qalý qaýpi tóngen. Al eger Qytaıdyń kóne tilin oqymaı kelgen jaǵdaıda tanys pen belgili bir somadaǵy qarajat arqyly ǵana jumysqa ornalasýǵa bolady», — dep jazady «Aqtóbe Taıms» «SNPS-Aqtóbemunaıgaz» kompanıasyndaǵy bassyzdyqty áshkerelep.
«SNPS-Aqtóbemunaıgaz» kompanıasynyń jetekshileri óziniń jańa zańdarymen jumysshylaryn sarsańǵa salyp, olardyń ashýy men qarsylyǵyn týdyryp otyr. Bul qujattar qazaqstandyqtardyń eńbek quqyqtaryn shekteıdi jáne tildik dıskrımınasıanyń ashyq túrde kórinis berýi bolyp esepteledi. Buǵan deıin kompanıa basshylarynyń «75% qyzmetkerler — nadan, bilimsiz jáne jalqaý» degen málimdemesi jaryq kórgen bolatyn.
Kompanıa prezıdenti Van Szúnjenniń aýzynan shyqqan bul áńgime osy jyldyń tamyz aıynan beri jalǵasyp keledi. Barlyq jumysshy qytaı tilin bilýge jáne ony kún ótken saıyn jetildirip otyrýǵa mindetti bolyp shyqty. Onymen qosa, baıǵus qazaqtardyń 6 aıda bir ret mindetti túrde sol tilden emtıhan tapsyrýy kerek eken.
Óz jerimizde júrip ózgege jem bolǵanymyzben qosa, sol ulttyń tili men dástúrin qabyldaýǵa májbúr bolyp qalǵanymyz sumdyq emes pe?! Keshe orystyń «kreshenıesinde» sýǵa túsip, shoqynýdy úırensek, búgin qytaıdyń «ıeroglıfterin» jattap júrmiz…
Derekkóz:"Ult" portaly
