Reseılik RIA-Novostı agenttigi Qazaqstannyń premer-mınıstri Kárim Másimovtiń ulttyq valúta teńgeniń baǵamyna qatysty pikirin jarıalady.
Onda premer-mınıstr teńgeniń baǵamy belgili bir tepe-teńdik núktesine jaqyndap qalǵanyn aıtqan.
«Biz salystyrmaly túrde tepe-teńdik núktesine jaqyndap qaldyq dep oılaımyn. Jaqyn bolashaqta, meniń oıymsha, birneshe aptanyń ishinde, dollarǵa shaqqandaǵy rúbl baǵamynyń da, teńge baǵamynyń da turaqtalǵanyn kóretin bolamyz. Men bul óte mańyzdy dep oılaımyn. Sol teńdik núktesine jetkende jaǵdaı turaqtalady jáne uzaq merzimdi boljamdar jasaýǵa múmkindik týady», - degen «sáýegeılik» tanytady K. Másimov.
Onyń bul aıtqanynan uqqanymyz, úkimet basyndaǵylar ne teńgeniń osynshama quldyraıtynyn kúni buryn bilgen, ne qazirgi qarjy naryǵynda bolyp jatqan jaǵdaılarǵa qatysty qandaı da bir naqty zertteý júrgizip otyrǵan joq. Áıtpese, «Ulttyq valútanyń quldyraýy tepe-teńdik núktesine jaqyndap qaldy» degeni qaı sasqany? Odan keıin, K. Másimov baǵamnyń ol «núktege» jaqyndap qalǵanyn qandaı negizderge súıenip aıtyp otyr? Qandaı kórsetkishterge baılanysty úkimet basshysy osyndaı oıǵa kelgen? Bul, árıne, siz ben biz úshin jumbaq.
Qarjy-ekonomıkalyq salasyndaǵy zor bilim ıesi keıpinde sóılegen Másimov myrza saıtqa bildirgen pikirinde sondaı-aq qazaq valútasynyń quldyraýyna Reseıdiń de qatysy joq emestigin aıtyp ketipti. Ol tól valúta baǵamyna birinshiden munaı baǵasy áser etse, ekinshiden rúbldiń dollarǵa qatysty baǵamy da yqpal etetinin jasyrmaǵan.
«Meniń oıymsha, qazirgi ekonomıkalyq jaǵdaı, munaı baǵasy, rúbldiń dollarǵa shaqqandaǵy baǵamy teńgeniń negizgi valútalarǵa qatysty baǵamyna yqpal etýde. Meniń boljamym boıynsha, qysqa merzimdi kezeńde munaı baǵasynyń quldyraýy jalǵasa beredi. Soǵan saı teńgeniń de dollarǵa qatysty tolqýy jáne kerisinshe jaǵdaı oryn alady», - degen suhbat ıesiniń sózderinen osy qalaımaqanǵa soltústik kórshimizdiń qalaı da qatysy bar degendi ǵana uǵa aldyq.
Al, endi «Ulttyq bank úshin aıyrbas baǵamy emes, ınflásıaǵa sáıkes baǵa kórsetkishteri mańyzdy bolyp otyr. Alaıda, árıne, adamdar úshi, bári úshin aıyrbas baǵamy óte mańyzdy» degeninen ne túsinýge bolatynyn ózińiz baǵamdap kórińiz.
Sońǵy ýaqytta premer-mınıstrdiń otandyq aqparat quraldarynan kóp kórinbeı ketýiniń sebebin reseılik BAQ-ta jarıalanǵan osy pikirinen keıin túsingendeı boldyq. Teńgeni tentiretip jiberip, el ekonomıkasyna ıe bola almaı qalǵan ol kún saıyn otandyq telearnalardan osyndaı jańyltpashtar aıtyp otyrsa, halyq aldynda áldeqashan jeksuryn bolyp keter me edi, bálkim?!
Jomart Abdollauly
