Ulttyq ulan «Ońtústik» óńirlik qolbasshylyǵynda Táýelsizdigimizdiń 25 jyldyǵyna oraı  qaraýyl bastyqtary men jaýyngerlik daıarlyqta úzdik kórsetkishterge qol jetkizgen áskerı qyzmetkerlerdi ulyqtaýǵa arnalǵan saltanatty kesh ótti, - dep habarlaıdy «Qamshy» portaly atalǵan qurylymnyń baspasóz qyzmetine silteme jasap.

 İs-shara barysynda Ulttyq ulan «Ońtústik» óńirlik qolbasshylyǵynyń qolbasshysy Álibek Serálıev jáne «Ońtústik» óńirlik qolbasshylyǵy Ardagerler keńesiniń tóraǵasy otstavkadaǵy polkovnık Gennadıı Faleev qaısar da ójet is-áreketterimen qyzmet babynda kózge túsip erekshelengen áskerı qyzmetshilerdi «Qoǵamdyq tártipti saqtaǵany úshin» jáne «Baýyrjan Momyshuly - batyr shapaǵaty» keýde belgilerimen marapattady.

Atap óterligi, búgingi keshte İle aýdany Jetigen kentinde joǵalyp ketken 20 jastaǵy Aızada Avlatarovany tabýǵa úlken septigin tıgizgen 5571 áskerı bóliminiń ofıseri, áskerı jasaq bastyǵy Rýstam Serdalınovqa Qazaqstan Respýblıkasynyń İshki ister mınıstri Qalmuhanbet Qasymovtyń buıryǵymen berilgen kezekten tys «aǵa leıtenant» áskerı shenin «Ońtústik» óńirlik qolbasshylyǵynyń qolbasshysy Álibek Serálıev saltanatty túrde tabys etti. 

- Men úshin basty maqsat – Otanyma qaltqysyz adal qyzmet etý, ózim osy Ulttyq ulan qatarynda sarbaz, odan kelisimshart boıynsha áskerı qyzmetshi bola júrip, ofıserlik laýazymǵa deıin kóterildim, bul maǵan komandırler men bastyqtardyń úlken senim artýy dep bilemin. Búgin «Ońtústik» óńirlik qolbasshylyǵy qolbasshysynyń qolynan kezekten tys «aǵa leıtenant» áskerı shenin aldym, bul men úshin úlken mártebe, budan keıin de qyzmettik-jaýyngerlik mindetterimdi abyroımen atqarýǵa, el senimin aqtaýǵa sóz beremin – dep, Rýstam aǵynan jaryldy.

Kesh sońynda úzdik áskerı qyzmetshilerge arnaıy konserttik baǵdarlama uıymdastyrylyp, is-shara áýelegen án men ásem bıge ulasty.