BUU turaqty úılestirýshisi, BUU damý baǵdarlamasynyń Qazaqstandaǵy ókili Norımas Shımomýra ál-Farabı atyndaǵy QazUÝ-da resmı is-saparmen boldy, - dep habarlaıdy «Qamshy» portaly ýnıversıtettiń baspasóz qyzmetine silteme jasap.
Kezdesý barysynda táýelsizdik alǵan ýaqyttan beri ýnıversıtet BUU, álemniń eń bedeldi halyqaralyq uıymnyń qyzmetine stýdentter men ǵalymdardy belsendi tartyp kele jatqandyǵy aıtyldy. 2011 jyly ýnıversıtet Ortalyq Azıa JOO arasynda birinshi bolyp Birikken Ulttar Uıymynyń (BUU) Bas hatshysy Pan Gı Mýnnyń bastamasymen qurylyp, Akademıalyq yqpaldylyq (UNAI) baǵdarlamasyna qosyldy. BUU-men yntymaqtastyq ornatý ýnıversıtet úshin basymdylyq bolyp tabylady. UNAI baǵdarlamasy BUU jetekshi qaǵıdattaryna negizdelgen álemdegi eń úzdik JOO-nyń stýdentteri men zıatkerlik elıtany biriktiredi.
Elbasynyń turaqty damýǵa baǵyttalǵan G-Global jáne «Jasyl kópir» ıdeıalaryn júzege asyrý maqsatynda QazUÝ «Green Bridge through Generations» platformasyn ázirledi. 2012 jyly Rıo-de-Janeıroda ótken «Rio+20» konferensıasynda QazUÝ óz alańqaıyn usynǵan jalǵyz ýnıversıtet boldy. Bilim men ǵylymnyń turaqty damýy boıynsha IýNESKO-nyń jergilikti haby men BUU jahandyq habyn basqarý mártebesi bizdiń ýnıversıtetke senip tapsyrylǵan. Búginde QazUÝ jyl saıyn Ortalyq jáne Ońtústik Azıa, Eýropa men AQSH-nan 300-den asa stýdenttiń basyn qosatyn «BUU modeli - Jańa Jibek joly» halyqaralyq stýdenttik oıyn-konferensıasyn uıymdastyrý men ótkizý jumystaryna belsendi atsalysyp otyr.
N. Shımomýra ózin jyly qarsy alǵan QazUÝ-niń ujymyna alǵys bildirip, ýnıversıtettiń turaqty damý boıynsha kósh bastap kele jatqandyǵyn jáne BUU-nyń artqan úlken senimin atap ótti. Onyń pikirinshe turaqty damý bastamasyna kóbirek adam tartqan durys. «Bizdiń maqsatymyz neǵurlym kóp adamdy aqparattandyrý arqyly turaqty damý ıdeıasyn alǵa jyljytý. QazUÝ tájirıbesi basqa kóptegen joǵary oqý oryndaryna jaqsy úlgi. BUU, kásipkerler men ýnıversıtetter arasynda úsh jaqty áriptestik modelin qurastyrý kerek. Ol turaqty damýǵa asa qajet memlekettik-jekemenshik dıalogyn nyǵaıtýǵa tıimdi alańqaı usynady».
Halyqaralyq qatynastar fakúltetiniń dekany Kárimjan Shákirov QazUÝ-da 2015 jyldyń 22 qazanynda BUU ókilderiniń qatysýymen uıymnyń 70 jyldyq mereıtoıyna oraı «BUU qazirgi tańda álemde alatyn orny men turaqty damý máseleleri» atty ǵylymı-tájirıbelik konferensıanyń ótkenin atap ótti. Bul shara UNAI haby bolyp esepteletin ýnıversıtet uıymdastyrǵan is-sharalardy qorytyndylaıtyn konferensıa boldy.
Norımas Shımomýra ýnıversıtet basshylyǵy men oqytýshy-professorlyq quramnyń jasaǵan jumystary men jetken jetistikterin atap ótip, 2016 jyldyń mamyr aıynda ál-Farabı atyndaǵy QazUÝ stýdentterimen kezdesýdi josparlaǵanyn aıtty.
