Baqytgúl ZARQUMAR – 1974-jyly 15-qyrkúıekte Mońǵolıanyń Ýlaanbaatar qalasynda dúnıege kelgen. Mońǵolıa Jastar Odaǵynyń altyn medaliniń ıegeri, aqyn. "Júrektegi júzik" jyr kitabynyń avtory.

Kereıdiń,
Kerbez qyzymyn,
Tektiniń,
Terme izimin.
Altaıdyń,
Arǵy betinde,
Qaldyrǵan,
Qara úı úzigin...
Taýmenen,
Tamyr jalǵaǵan,
Asyp bir,
Aqqan arnadan.
Kók aspan,
Kóńil kóginde,
Qaǵyp bir,
Qanat samǵaǵan.
Taǵdyryn,
Tastap asqardan,
Altaıdan,
Arman bastalǵan.
Saqtardyń,
Sazyn tyńdaǵan,
Baǵzylyq,
Bal-bal tastardan.
Jorǵalap,
Jorǵa minetin,
Syrǵasy,
Sylq-sylq kúletin.
Kereıdiń,
Kerbez qyzymyn,
Baǵasyn,
Babyn biletin.
Talaıdyń,
Tasyn qulatqan,
Jaýynyń,
Jasyn shylatqan.
Tabany,
Tańda shyq basyp,
Janary,
Janǵan shyraqtan.
Áni bar,
Áýen ,yrǵaqty,
Tósengen,
Tóre syrmaqty.
Kóńili,
Kóktem,kózi nur,
Anadan,
Abaq jurnaq-ty.
Aryna,
Adal qaraıtyn,
Balany,
Baqyt sanaıtyn.
Jartykesh,
Jaryq jalǵannyń,
Jyrtyǵyn,
Jyrmen jamaıtyn.
Kózderi,
Kóktem kózindeı,
Sózderi,
Sónbes sezimdeı.
Talaıy ,
Taǵdyr keshken bir,
Bolmysy,
Bolat tózimdeı.
Kereıdiń,
Kerbez qyzymyn,
Tektiniń,
Terme izimin.
Altaıdyń,
Arǵy betinde,
Qaldyrǵan,
Qara úı úzigin...

      * * *

Kózderimnen aǵyp tústi sulý muń,
Kóp eken ǵoı syry ómir súrýdiń.

Adaldyǵyn alasartqan qoǵamnyń,
Aldynda men kelmeıdi ras tonalǵym!

Jaqsylyǵyn saýdalamas pendeniń,
Jany taza kelerine sengemin.

Ádileti jetpeı turǵan ǵasyrdyń,
Ámirine kelmeıdi esh bas urǵym!

Jasyndary qamshylaǵan ǵaryshtyń,
Janarynan tógiledi bar ushqyn.

Etegine súrinetin ǵaıbattyń,
Ezýdegi ermegine aıǵaq kim?!

Daralyǵym baǵym álde sorym da,
Dańq pen ataq taptalady jolymda!

Minezdiniń mini jaqpas kópke shyn,
Mindetsiner tobyr keıde ókpesin.

Keshirimge kesip berdim basymdy,
Keýdemdegi tunshyqtyryp jasymdy...
 
          * * *
Aınalamda qarǵa-quzǵyn qarqyly,
Aspanymda jasyndardyń jarqyly...
Men bıiktep kettim sirá, sheksizge,
Meni tómen tartatyndar arqyly...

Aınalamda aq pen qara arpalys,
Aqıqatty qamap qoıǵan qaltarys.
Keshegi ótken Muqaǵalı órtenip,
Keshken muń ǵoı, Abaı menen alty arys.

Aınalamda ańyz jyry tobyrdyń,
Aqıqattan basqa meniń joq úlgim.
Janymdaǵy jarylystar kúshimen,
Jantalasqa tústim, jarǵa soǵyldym.

Aınalamda maıdalardyń maıdany,
Artyq kórgen aıarlyq pen aılany,
Meni nege shaqyrmaısyń qasyńa,
Men dep soqqan aqyn júrek aıdaǵy?!

Aınalamda pıǵyly tar,turqy pás,
Adamdar júr, bir sheńberde, bir tutas.
Moıyndamas tirliginde aqyndy,
Moıyndatar moladaǵy qulpytas...


          * * *
 

Taǵdyrymdy tastap ketip qalar em,
Tas úılerdi, tastaq joldy qalamen.
Maǵan ǵana arnalǵandaı bir úıdiń,
Mahabbatyn kótere alsa bar álem?!

Kótere alsa,erkindikti kók pen jer,
Kóship sonda barsa móldir kóktemder.
Kúreńitken kúzder qonaq bop tursa,
Kúnniń nury,aıdyń syry tókken zer.

Keter edim,júregimmen án salǵan,
Kezdespedi,alystady qansha arman?!
Tabıǵattan taq ornatqan sol úıdiń,
Tańyn bálkim, saǵynyshtar qarsy alǵan…

Jeter edim, ańsap, sharshap, saǵynyp,
Jerigendeı bar tirlikten arylyp.
Tynyshtyqtyń besiginde terbelgen,
Tylsym meken kútse meni sarylyp…
          
       * * *

Janaryma sıa almaǵan jalqylyq,
Janushyra jaryq aıǵa talpynyp…
Qanattaryn qaǵyp-qaǵyp aspandap,
Qaıta oralsa qapylysta qashqan baq…
Maqpal túnniń qushaǵynda maýjyrap,
Mahabbattan tas balqysa, taý jylap…
Shymyldyqty ysyra almaı dirildep,
Shyraǵymdy óshire almaı kúbirlep…
Tań atpasa dep tileýmen talyqsyp,
(Taǵdyr jazsa táýekelshil zar ystyq…)
Saǵynyshtan sazǵa aınalsam dep edim,
Saǵan biraq, aıta almaımyn sebebin…
        
             * * *

 

Nelikten eken,
Birtúrli janym qysyldy,
Súıetin bálkim, bir jannyń baryn túsindi…
Únsizdikterdiń ózinen úndestik jasap,
Mahabbat,
Maǵan sezdirshi, jalyn kúshińdi?!

Nelikten eken,
Bilmedim, janarym taldy,
Taýysa alar emespin,shara muńdardy…
Túngi aýa meni shaqyrdy aspanǵa qaraı,
Qarańǵy bólme ishinde,
Qaǵaz ben qalamym qaldy…
       
       * * *
Jan-jaǵym jalǵan dúnıe, jasandylyq,
Janymdy jiberdi ǵoı, qasań qylyp...
Jabyrqaý tirligimdi jasyramyn,
Janardyń jaryǵymen jasandyryp...

Jaqynym jarǵa ıterdi keshe meni,
Jazǵyra almas pende pesheneni.
Jaratqan jaqsylyqtan úmittimin,
Jasymdy iship turyp kesedegi...
    
          * * *
Ǵalamda mynaý ǵajaby basym,
Ǵashyqtyq baqyt der edim...
Maqamy syrshyl,nazary jasyn,
Mahabbat saǵan senemin!
Jaýapsyz qalsa jabyqpa der em,
Janyńnyń jalqy bir áni.
Kógińde mendik qalyqtap óleń,
Kókshe shyń bolsyn turaǵy.
Ańsary bólek,talǵamy bıik,
Aıdyń da bar-aý bir muńy?!
Qalmasa deımin armany kúıip,
Qamyǵyp júrek bulbuly.
Ǵalamda mynaý ǵajaby basym,
Ǵashyqtyq baqyt der edim.
Maqamy syrshyl,nazary jasyn,
Mahabbat saǵan senemin!!!
      

        * * *
Kofe iship otyrmyn ońashada,
Koftamdaǵy gúlderge jan bitirip.
Qansha ýaqyt jastyqty tonasa da,
Qarsy alarmyn taǵy da tańdy kúlip.
Kofe iship otyrmyn oıym dara,
Koftamdaǵy gúlderden kórindi muń.
O,júregim...ýaqytty moıyndama,
Oınaǵysy kelse de ólim búgin.
Kofe iship otyrmyn ońasha tym,
Koftamdaǵy gúlder de syrǵa bókken.
Mahabbatqa mazdaǵan jol ashatyn,
Maǵan ómir bir ánin qurban etken.
Kofe iship otyrmyn qushyp arman,
Koftamdaǵy gúl bitken ashyldy bir.
Seni qashan pendeler túsine alǵan,
Sezimderi sembeıtin asyl ǵumyr?!