6 aqpanda M.Áýezov atyndaǵy Qazaq memlekettik akademıalyq drama teatrynyń 90-maýsymynyń alǵashqy jańa spektakliniń tusaýy kesilmek, - dep habarlaıdy «Qamshy» portaly teatrdyń baspasóz qyzmetine silteme jasap.

A.Volodınniń «Qoshtasqym kelmeıdi…» dramasyn aýdarǵan jáne sahnalaıtyn qoıýshy-rejısser – QR eńbek sińirgen qaıratkeri Asqat Maemırov.

«Tereń psıhologızmmen erekshelenetin kórnekti orys dramatýrgy A.Volodın pesasy boıynsha qoıylymǵa  ajyrasýǵa bel býǵan segiz otbasynyń árqıly taǵdyry  arqaý bolady. Jasy, áleýmettik mártebesi, dúnıetanymy jaǵynan ártúrli birneshe shańyraq ıeleri san túrli ómir dramasyna ushyrap, kúmán-kúdikke, tákapparlyqqa boı aldyrady – baqytty kezdesýler baıansyz qoshtasýlarǵa ulasqaly tur. Nekelerin buzýǵa sotqa kelgen olardy tatýlastyrmaqqa sýdıa baryn salady. Alaıda ózimshil erli-zaıyptylar  birin-biri tyńdaýdan, túsinýden qalǵan», - delingen habarlamada.

Sharttylyq beleń alatyn qoıylymda ár keıipker ártúrli tanym, jeke dúnıetanymyn alǵa tartady. Árbir keıipker, ıaǵnı árbir adam – jeke álem, tek sol álemge úńilý, ony túsine, qajet bolsa keshire bilý – úlken qasıet.  Negizinen teatrdyń jas býyny qatysatyn spektákl ómirdiń osy bir qarapaıym da kúrdeli pálsapasy týraly oılarǵa jeteleıdi.