Rýdnyı qalasynyń turǵyny Baqtybaı Kenjeǵulovtyń monshaqtan tizip, túrli buıymdar jasaı bastaǵanyna bir jyldan asypty.
Múmkindigi shekteýli jan endi úıirme ashyp, ónerin taǵdyrlastaryna úıretkisi keledi. İsmerdiń eń úlken armany - elordada ótetin EHRO-2017 kórmesine qatysý. Muqtajdyq - myń ónerdiń anasy. Densaýlyǵy syr bergen Baqtybaı Kenjeǵulov kóńilin aýlaıtyn kásip izdedi. Birde ońtústiktegi Saryǵash aýdanyna joly túsip, monshaqtan buıym jasaıtyn shebermen jolyǵyp, osy ónerdi úırendi. Qazir ábden tóselgen. Kenshiler qalasynda kádesyıǵa tapsyrys berýshiler kóbeıip keledi, - dep jazady 24.kz.
«Týǵan kún sıaqty merekelerge arnap sómkelerge tapsyrys berip ketedi. 11:00-de bastasam, erteń keshke deıin daıyndap beremin. Budan kóbi 3-4 kúnge ketip qalady. Bir gúldi tez istegende 20 mınýtta bitiremin», - dedi Baqtybaı Kenjeǵulov.
Monshaqtardy eseppen tizý, qalypqa keltirý, tastardyń úılesimin tabý ońaı sharýa emes. Temirdeı tózim, ushqyr qıal kerek. Mundaıda Baqtybaıǵa kelinshegi Gaýhar kómektesedi. İsmerdiń eń birinshi synshysy da, qoldaýshysy da jubaıy. Kóz jaýyn alatyn ár buıym kóz maıyn taýysqan jankeshti eńbekpen keledi.
«Árqaısysy ártúrli bolady. Bir qoldan shyqsa da, basqasha bolady. Ekeýi birdeı bolmaıdy. Birinshiden, bul óner taza, ásem, ádemi kórinedi. Árbir istegen zaty suranysqa ıe», - deıdi sheberdiń jary Gaýhar Álıeva.
Baqtybaı - ekinshi toptaǵy múgedek. Kemtar ekenmin dep memleketke masyl bolatyn adamyń ol emes. Sheber kádesyıdan bólek ulttyq naqyshtaǵy buıymdar, elimizdiń rámizderin toqıdy. Olardyń bári búginde saýdalanyp ketken. Qolónershi Qazaqstannyń maqtanyshtaryn endi halyqaralyq deńgeıde nasıhattaýǵa yntaly.
Baqtybaı Kenjeǵulov, qolóner sheberi:
« Aqordany istep kórdik. Ádemi shyqty. Pıramıdany istep kórdik, ol da ádemi shyqty. Endigi oıym - Qazaqstannyń kýrortty aımaqtaryn jasaý. Solardy EHRO-2017 kórmesine shyǵarý», - deıdi sheber.
Qolónershi Ózbekstannan 2000 jyly elge oraldy. Alǵashynda Ońtústik Qazaqstanda turdy. Rýdnyıǵa bes jyl buryn kóship keldi. Sodan beri páter kezeginde tur.
«Jeke páterge ıe bolsam, múmkindigi shekteýli jandarǵa arnap qolóner úıirmesin ashar edim», -deıdi ol.
