«Orda» tobynyń músheleri ózderin ár qyrynan synaýdy qoıar emes. Buǵan deıin top ánshisi Erbolat Bedelhan «91» degen top qursa, onyń toptaǵy taǵy bir áriptesi Dastan Orazbekov jańa «Turkiss» atty qyzdar tobyn tanystyrdy, - dep habarlaıdy «Qamshy» portaly juldizdar.kz-ke silteme jasap.

Ótken jyly sáýirde «Orda» tobynyń múshesi Dastan Orazbekov óziniń qyzdardan quralatyn tobyna kastıng jarıalaǵan bolatyn. Ánshi qazaqstandyq estradada erekshelenip turatyn top qurmaq nıetti bolǵan. Kastınge qatysqan 500-ge jýyq qyzdyń ishinen Dalıda, Anelı jáne Janar esimdi qyzdar tańdap alynyp, topqa «Turkiss» degen ataý berildi. Qyzdardy estradaǵa daıyndaýǵa azdy-kópti 10 aı jumsalǵan.

Dastan Orazbekovtyń pikirinshe, toptyń áýeni basqa toptardan ózgeshe, eshqaısyna uqsamaıdy. Joba Qazaqstanda ǵana emes, Ázerbaıjanda da óner kórsetetin bolady. Toptyń ázerbaıjandyq prodúseri — Isa Melıkov bir kezderi qarapaıym ánshiler Eldar Gasymov pen Nıgár Djamaldy «Evrovıdenıe» jeńimpazy deńgeıine deıin jetkizgen ataqty prodúser.

«Turkiss» tobynyń músheleri kishkentaıynan bımen, ánmen aınalysqan qyzdar. Dastan Orazbekovke bul sala ázirge tańsyq, sebebi ánshi buǵan deıin tek jigitterden quralǵan toptarmen jumys istep kelgeni bárine málim. «Men úshin qyzdarmen jumys isteý ómirimdegi eń qıyn kezeń bolatyn shyǵar. Olardyń kózinen qorqynyshty nemese isteı alar ma ekenbiz degen kúmándi kórgende, ózim de qatty qapalanamyn» — deıdi prodúser.

Búginde «Turkiss» toby án jazyp qana qoımaı, oǵan beınebaıan túsirip úlgergen. Beınebaıannyń túsirilimi Kıevte ótti — qazir montaj jumystary júrgizilip jatyr, kóp uzamaı toptyń tuńǵysh týyndysyn kórýge múmkindik týady.