Qazaqstan Bllomberg agenttigi 4 aqpan kúni jarıalaǵan «Baqytsyzdyq ındeksi -2016» esebi boıynsha álemdegi eń osal ekonomıkaly elderdiń ondyǵyn tuıyqtap tur, - dep habarlaıdy «Qamshy» portaly.

Agenttik sarapshylary 63 memlekettiń ekonomıkalyq kórsetkishteri men halqynyń turmys-tirlishigin taldaǵan. Indeksti ázirleýde jumyssyzdyq pen ınflásıa deńgeıi negizge alynǵan. Osy eki kórsetkish boıynsha Venesýela sońǵy eki jylda atalǵan ındekste birinshi oryn ıelenip otyr. Elde 2015 jyly ınflásıa deńgeıi 98,3 paıyzdy, jumyssyzdyq 6,8 paıyzdy quraǵan. Bıylǵy jyly bul kórsetkishter sáıkesinshe 152 jáne 7,7 paıyzdy quraıdy dep kútilýde.

Ekinshi oryn Argentınaǵa, úshinshi oryn Ońtústik Afrıka respýblıkasyna tıesili. Tórtinshi orynǵa Gresıa, besinshi orynǵa Ýkraına turaqtaǵan. Baqytsyzdyq kórsetkishi boıynsha Qazaqstannyń aldynda taǵy Ispanıa, Serbıa, Túrkıa, Brazılıa bar. Ortalyq Azıanyń bizden basqa elderi bul reıtıńe enbegen.

Al, «Eń baqytty elder» reıtıńine AQSH, Malaızıa, Rýmynıa, Ulybrıtanıa, Gonkong, Danıa, Qytaı, Ońtústik Koreıa, Taıvan, Japonıa kirip otyr. Baqytty elderdiń tiziminde alǵashqy úshtikti kedeıshilik deńgeıi óte tómen Shveısarıa, Sıngapýr men Taıland bastap tur.

Baqytsyzdyq jaǵynan ondyqqa engen elderdegi halyq sanyna toqtalsaq, Venesýelada 31, 7 mıllıon, Argantınada 42 mıllıon, OAR -52,9 mıllıon, Gresıada 11 mıllıon, Ýkraınada 45,4 mıllıon,  Ispanıada 42,8 mıllıon, Serbıada 7,1 mıllıon, Túrkıada 74,9 mıllıon, Brazılıada 200,4 mıllıon halyq turady. Al, Qazaqstannyń halyq sany 17 mıllıonnan sál asady. Joǵaryda aıtylǵan elderdiń basym bóligi Qazaqstan sıaqty tabıǵı baılyqtardyń mol qoryna ıe emes. Qazaqstan 2014 jyly mıneraldy resýrstar qory baı bes eldiń tiziminde tórtinshi orynǵa turaqtaǵan bolatyn. Qazaqstannyń naqtylanǵan munaı qory 30 mıllıard bareldi, gaz qory 1,28 trln.tekshe metrdi, kómir keniniń barlanǵan qory 33,600 mıllıon tonnany quraıdy. Jylyna 1,5 mıllıon barelden astam munaı óndirip, satatyn eldiń ózin «baqytsyz sanaıtyn» halyqtardyń qatarynan kórinýi uıat jaǵdaı, árıne.