Almatynyń ortalyq kóshelerinde ornalasqan 35 baspana aldaǵy eki jylda súriledi. Olardyń ornyna kóp páterli 14 qabattan turatyn záýlim úıler turǵyzylady. Bul týraly Almaly aýdanynyń basshysy Serik Qusaıynov turǵyndarmen kezdesý barysynda málim etti, - dep habarlaıdy «Qamshy» portaly Almaty telearnasyna silteme jasap.

Aldaǵy eki jylda Shevchenko, Manas, Jambyl jáne Baızaqov kósheleriniń qıylysyndaǵy 35 eski úı tolyqtaı súriletin boldy. Olardyń ornyna kóp páterli 14 qabattan turatyn záýlim úıler turǵyzylady. 10-nan astam kóshe kúrdeli jóndeýden ótkiziledi. Bul Almaly aýdany ákiminiń halyq aldyndaǵy esep berý jıynynda málim boldy. Aýdan basshysy byltyrǵy atqarǵan jumystardy saralap, keler jylǵy josparymen bólisti. Kezdesýde áleýmettik máselelerge de den qoıyldy. Almaly aýdanynda 212 myńnan astam adam turady.

Almatynyń Jetisý aýdany da qarqyndy damýda. Bıyl atalmysh aýdanda 18 jekemenshik, 1 memlekettik balabaqsha jáne shaǵyn ortalyq ashylady. Al, mamyr aıynda 11 emhanananyń janyna qosylǵan 3 qabatty mekeme de turǵyndardy qabyldaı bastady. Jergilikti atqaminerler baspana máselesimen de belsendi aınalysýda.

«Goncharov kóshesindegi 4 turǵyn úı súrilgen bolatyn, olardyń ornyna 9 qabatty baspana salyndy. Qazirgi ýaqytta 9 qabatty ekinshi turǵyn úıdiń qurylysy qarqyndy júrgizilip jatyr»,- dedi Almaty qalasy Jetisý aýdanynyń ákimi Talǵat Razaqov.

Bazarlardyń basym bóligi ornalasqan Jetisý aýdanynda keler aıda jańa "Dovýn" bazary ashylady jáne 13-i qaıta jańartylady. Al, jeke kásipkerlerdiń qarjysyna 20 balalar oıyn jáne sport alańdary salynbaq. Esep bergen qos aýdannyń ákimderine joldanǵan turǵyndardyń máseleleriniń ońtaıly sheshilýin "Nur Otan" partıasynyń ókilderi baqylaýǵa alady.