باردى باعالاۋدى باسقادان ۇيرەنسەك ەتتى

/uploads/thumbnail/20170708220611300_small.jpg

گرۋزيانىڭ اتاقتى ءارتىسى سوسو پاۆلياشۆيلي تاياۋدا قازاقستاندا بولىپ، اقتاۋ قالاسىندا ۇلكەن كونسەرتى ءوتتى. ءارتىس ءان كەشىنىڭ سوڭىن الا «Lada.kz»  سايتىنا سۇحبات بەرىپ،  قازاقستان تۋرالى وي ءبولىستى. تىلشىمەن بولعان ەكەۋارا اڭگىمە بارىسىندا گرۋزيندىك ونەر يەسى ءبىراز نارسەنىڭ  باسىن قايىرىپتى. اندەرىنىڭ تۋۋ تاريحى، تىڭدارمان  تالعامى، اسىرەسە  ەلباسىمىزبەن بولعان بەيرەسمي  جۇزدەسۋى جايلى اقتارىلا سىر شەرتەدى.

«بۇل جۇزدەسۋ كۇنى بۇگىنگە دەيىن كوز الدىمدا، كورەگەن، اشىق مىنەزدى، كەرەمەت جان سوعان قاراماستان، بارىنشا مىقتى ادام، قۇددى  اكەمنىڭ اعاسىمەن  پىكىرلەسكەندەي اسەر الدىم» - دەيدى پالياشۆيلي. وعان قوسا ارۋ الماتىمىز بەن باس قالامىز استانا جايىندا دا جىلى لەبىزىن ءبىلدىرىپتى. اڭگىمەسىنەن قاراپايىمدىلىقتىڭ، شىنايىلىقتىڭ ءيسى اڭقيدى. ول قالاي دەيسىز عوي؟ سوسو «الماتى تبيليسي سەكىلدى اسەم، جىلى، جانعا جايلى قالا، ال استانا مۇلدە بولەك، ول ءبىر الىپ كەڭىستىك»، - دەسە، قازاقتار گەنەتيكالىق تۇرڭىدان تۇپ-تۋرا گرۋزيندەر سەكىلدى ونەر دەسە، ىشكەن اسىن جەرگە قوياتىندىعىن ايتادى.

«قوناق قويدان جۋاس بولۋ كەرەك» دەۋشى ەدى، مۇنىسى نەسى دەپ باستاپقىدا ىشتەي رەنجىگەن دە ەدىك. كەيىن تۇسىندىك، ءبىز رەنجىمەۋىمىز كەرەك ەكەن كەرسىنشە ۇلگى الۋعا ءتيىس ەكەنبىز. سوندا گرۋزين ازاماتى ۇلتىن سۇيگەنى ءۇشىن ايىپتى ما؟ كەرىسىنشە، گرۋزيندەر پالياشۆيليمەن ماقتانۋعا ءتيىس. ەگەر، الگى گرۋزيندىك ونەر يەسىنىڭ ورنىندا ءبىز بولساق نە ىستەر ەدىك؟ ەلدىڭ كوڭىلىنە قارايتىن قاشانعى كوڭىلشەكتىك ادەتىمىزگە باسىپ، الدىڭعى ايتقانعا ماقالداعىداي    ماقتاۋدى ۇيىپ-توگىپ، كەرىسىنشە تەڭەپ جىبەرۋىمىز بەك مۇمكىن بە ەدى؟ ال، ءارتىس «تبيليسي الماتى سەكىلدى، بولماسا گرۋزيندەر قازاقتار سەكىلدى» دەگەن جوق.  قانشاما قازاقتىڭ اراسىندا وتىرسا دا ويىن بۇكپەسىز اقتارىپ سالدى. راسى كەرەك، ءبىز ءوز قۇندىلىقتارىمىزدى قاشاندا وزگەلەردىكىنەن تومەن قويامىز. بولماسا، «بۋرابايدى قازاقتىڭ شۆەيسارياسىنا» بالاپ، ماعجاندى «قازاقتىڭ پۋشكينى» دەپ لاعار ما ەدىك؟ الەمدە ەشبىر ەل ءوزىنىڭ باعا جەتپەس قۇندىلىقتارىن  وزگەلەردىكىنە تەڭەمەيدى. مىناۋ تۇرعان كورشى قىرعىز اعايىننىڭ ءوزى «ىستىق كولىن»  قىرعىزدىڭ بەرمەتى دەپ، وزگەنىڭ   التىنىنا ايىرباستاعىسى جوق. ال،  ءبىز بارىمىزدى باعالاي الماي ءجۇرمىز. وسىندايدا پالياشۆيليدەي ازاماتى بار قوڭقاق مۇرىن حالىق راسىندا باقىتتى ەكەن-اۋ دەپ قالاسىڭ.

سالتانات ءالىمقۇل

پىكىر قالدىرۋ

قاتىستى ماقالالار