كەشە سايتىمىزدا پروديۋسەر بايان ەسەنتايەۆا جاريالاعان بايقاۋدىڭ ەكى ءفيناليستى انىقتالعانىن حابارلاعان بولاتىنبىز.

بۇگىن پروديۋسەر كىشكەنتاي بالانىڭ موڭعول تىلىندەگى ءانىن اينىتپاي قايتالاي العان 21 جاستاعى ستۋدەنت بەكجان ساۋىربايەۆ (ۆيدەو) پەن ارسەن تاحان (ۆيدەو) ەسىمدى بالاعا جۇلدەنى تەڭ ءبولىپ بەرەتىنىن ايتتى.

«مەن ءوز داۋىسىمدى وڭ جاقتا تۇرعان بالاعا بەرەر ەدىم. ءبىراق، ارينە كۇشتەرى تەڭ ەمەس. كىشكەنتاي بالا ءوزىنىڭ جاسىنا لايىقتى وتە جاقسى ايتىپ شىققان. سايىستىڭ قيىندىعىن ەسكەرە وتىرىپ، مەن جەڭىستى ەكى بىردەي ادامعا بەرۋدى ۇيعاردىم. قۇتتىقتايمىن!، – دەپ جازدى پروديۋسەر. ول سونداي-اق، بارشا قاتىسۋشىلارعا دا العىسىن ءبىلدىردى.

ەسكە سالا كەتسەك، بايان ەسەنتايەۆا ءوزىنىڭ ينستاگرامداعى پاراقشاسىندا كونكۋرس ۇيىمداستىرىپ، جەڭىمپازعا 1000 دوللار اقشالاي سىياقى بەرۋگە ۋادە ەتكەن بولاتىن. سايىس شارتى بويىنشا، كەز-كەلگەن قاتىسۋشى موڭعول بالاسىنىڭ ولەڭىن ءدال سول داۋىس ىرعاعىمەن قايتالاپ شىعۋى ءتيىس بولاتىن.