وسكەمەندىك كاسىپكەر، استانادا قازا بولعان ستۋدەن ەراسىل اۋباكىروۆ ءىسى بويىنشا كۇدىكتى ايان مەيىربايەۆتىڭ اكەسى ەسەن مەيىربايەۆ Tengrinews.kz-كە بولعان وقيعاعا قاتىستى پىكىرىن بىلدىرگەن، - دەپ حابارلايدى «قامشى» پورتالى.

رەداكسياسى وسكەمەندىك بيزنەسمەن ەسەن مەيىربايەۆپەن بايلانىسقا ءتۇستى.

ەسەن مەيىربايەۆ سۇحباتىندا بالاسىن سيپاتتاپ بەردى. "(...) تەرگەۋ ورگاندارى بارلىعىن انىقتاپ، بولىپ جاتقان وقيعاعا اقىلعا قونىمدى تۇسىنىك بەرەدى. ايانعا كەلەر بولسام، ول جاقسى بالا. وعان قاتىستى ايتىلىپ جاتقان ءسوز ماعان اۋىر ءتيىپ وتىر، ءبىراق اشۋعا بەرىلمەيمىن، ەشكىمدى ايىپتامايمىن، ەشكىمدى قورعاشتامايمىن. بەلگىلى ءبىر كۇش قۇرىلىمدارى بار، ولار بارلىعىن انىقتايدى"، - دەدى ول.

قازىرگى ۋاقىتتا ايان مەيىربايەۆتىڭ اكەسىنەن وسى ءىس بويىنشا كۋاگەر رەتىندە جاۋاپ الىنۋ ۇستىندە. ول بالاسىنان ەرتەدە ەراسىل اۋباكىروۆ جايلى ەستىمەگەنىن، ونىڭ ۇستىنە وسى ءىس بويىنشا اتى اتالىپ وتىرعاندار جايلى دا بىلمەگەنىن ايتىپ بەردى. "مەنىڭ بالام شاعىن كوممەرسيالىق كەلىسىمدەر بويىنشا ساتىپ الۋ جۇيەسىندە كەيبىر تاپسىرمالارىمدى ورىنداپ ءجۇردى. ول كومپانيامدا زاڭ جونىندەگى كەڭەس بەرۋشى مامان بولدى"، - دەپ ءتۇسىندىردى ول. 

ال "ءىرى بيزنەسمەن رەتىندە تەرگەۋ بارىسىنا اسەر ەتىپ، قىسىم تۇسىرە الاسىز با؟" دەگەن سۇراققا ول بىلاي دەپ مالىمدەدى: "كاسىپكەر دەگەن كىم؟ ول قۇداي ەمەس، قۇزىرى بار ادام ەمەس. ول قاراپايىم ەڭبەكقور، تاڭعى التىدان تۇنگى ون ەكىگە دەيىن ءتۇرلى نىسانداردا جۇمىس ىستەيدى. ەگەر ول ومىرىندە جەتىستىككە جەتسە، ءوز اقىلىمەن، ەڭبەگىمەن جەتەدى. ال ول كاسىپكەردىڭ بالاسى بولسا، مىندەتتى تۇردە بىرەۋ بولۋى كەرەك پە؟". 

سونىمەن قاتار، ول الەۋمەتتىك جەلىلەردە تارالىپ جاتقان ۆيدەولار مەن اۋديولارعا قاتىستى ويىن ايتتى. "(...) مۇنى دا تەرگەۋ شەشەدى. وقيعانىڭ ءاربىر ساعاتىن، ءاربىر مينۋتىن، سەكۋندىن قالپىنا كەلتىرۋگە بولادى. بۇل ءادىل بولادى. سول نىساندا نە بولعانىنىڭ بارلىعىن انىقتايدى"، - دەدى ول.  

ەسەن مەيىربايەۆتىڭ ادۆوكاتى، وكىلى ەرلان بەكبولوۆ تەرگەۋ مۇددەسىنە قاتىستى قۇپيا ماتەريالداردى تاراتپاۋ جونىندە ءوتىنىش بەرگەندەرىن ايتتى. "ۆيدەوداعى ماسەلگە تەرگەۋ باعا بەرەدى. ءبىز ءوتىنىش بەردىك، شىن مانىندە بۇل سۋرەتتەر مەن ۆيدەولار تەرگەۋ مۇددەسى ءۇشىن قۇپيا ساقتالۋى ءتيىس، ولار قوعامدىق پىكىردى قالىپتاستىرادى، مۇنى قولدانىپ كەتۋگە مۇددەلى ادامدار بولۋى مۇمكىن، سوندىقتان بۇل تەرگەۋدىڭ ءادىل وتۋىنە جانە تولىق بولۋىنا اسەر ەتۋى مۇمكىن. سوندىقتان ءبىز وسى ماتەريالداردىڭ بۇدان بىلاي ينتەرنەتتە پايدا بولماۋىنا قاتىستى ءوتىنىش تۇسىردىك. بىزگە تەرگەۋدىڭ قۇپيالىعى جايلى ايتادى، ءبىراق بىزگە بەلگىسىز دەرەككوزدەردەن ۆيدەولار مەن سۋرەتتەر پايدا بولىپ، ءبىرجاقتى پىكىردى قالىپتاستىرادى"، - دەدى ول.

بەكبولوۆتىڭ ايتۋىنشا، تاراپ ازىرشە رەسمي مالىمدەمە جاسامايدى. "قۇزىرلى ورگانداردىڭ رەسمي مالىمدەمەلەرىن كۇتۋ دۇرىس بولار ەدى. ءىستى ق ر ءىىم تەرگەۋ دەپارتامەنتى تەرگەپ جاتىر. ءوز ءىسىنىڭ ماماندارى ىسكە كىرىستى. ايانعا ق ر قىلمىستىق كودەكسىنىڭ 99-بابى بويىنشا ايىپ تاعىلدى. ءبىز تەرگەۋدىڭ نۇسقاسىمەن كەلىسپەيمىز، تەرگەۋدىڭ اياقتالۋىن كۇتىپ وتىرمىز. تەرگەۋ مۇددەسىنە بايلانىستى قۇپيالاردى ءبىز جاريا ەتە المايمىز. (...) اياندى 10 اقپاندا ۇستادى"، - دەدى ادۆوكات. 

"ول ۇشاقپەن ءوزى كەلدى. ەشكىمنەن جاسىرىنعان جوق. ول ماعان وسكەمەنگە ۇشىپ كەلدى دە، باسىنان وتكەن جاعدايدى ءتۇسىندىردى. مەن وسىندا ۇشىپ كەلدىم. وعان قايتىپ كەتىپ، ءتۇسىندىرۋى كەرەكتىگىن ايتتىم. قاشىپ كەتكىسى كەلسە، قاشاتىن ەدى، جاسىرىنعىسى كەلسە، ونىڭ وعان مۇمكىندىگى بولدى. ول شاقىرتىلعان كۇنى-اق ۇشاققا وتىردى دا، استاناعا ۇشىپ كەلدى. (...) باستى نازاردى مەنىڭ ۇلىما اۋدارىپ وتىرعاندارى بايقالادى، فاميلياسىن اتاپ. ولاي بولسا بارلىعىنىڭ دا ءاتى-جونىنىڭ اتالعانىن قالايمىن"، - دەدى ەسەن مەيىربايەۆ. 

23 جاستاعى ەراسىل اۋباكىروۆتىڭ دەنەسى 10 اقپاندا جەدەل-ىزدەستىرۋ جۇمىستارىنىڭ بارىسىندا تابىلدى. قىلمىس جاسادى دەگەن كۇدىكپەن ءتورت ادام ۇستالدى. 

ەراسىل اۋباكىروۆ ەلورداداعى جوعارى وقۋ ورنىنىڭ التىنشى كۋرسىندا وقىدى. 3 اقپاندا ۇيىنەن شىعىپ كەتىپ، قايتا ورالمادى. كەلەسى كۇنى دوستارى ونىڭ جوعالىپ كەتكەنىن حابارلادى. اۋباكىروۆ ينتەرن-حيرۋرگ بولعان. ستۋدەنتتىڭ دوستارى ونىڭ ۇزدىك وقىعانىن، بەلسەندى بولىپ، قاتارلاستارىمەن جاقسى قارىم-قاتىناستا بولعانىن اتاپ ءوتتى.