قاراعاندى وبلىسىندا تاسقىن سۋدان بولۋى مۇمكىن ءقاۋىپتىڭ الدىن الۋ جۇمىستارى تولىق ورىندالعان، - دەپ حابارلايدى «قامشى» پورتالى 24.kz-كە سىلتەمە جاساپ.

قاراعاندى وبلىسىندا تاسقىننىڭ الدىن الۋ ءۇشىن قانداي جۇمىستار اتقارىلۋدا؟ وزەن-كولدىڭ جاي-كۇيى قانداي؟ بىلتىرعى جاعداي قايتالانۋى مۇمكىن بە؟ توتەنشە جاعدايلار كوميتەتىنىڭ ءتوراعاسى ۆلاديمير بەككەر وڭىرگە ىسساپارمەن بارىپ، ايماقتى ارالاپ، قۇتقارۋشىلاردىڭ دايىندىعىمەن تانىستى. سونداي-اق اپاتتىڭ الدىن الۋ جۇمىستارىنىڭ تولىق ورىندالعانىنا كوز جەتكىزدى. ەستەرىڭىزگە سالا كەتەيىك، بىلتىر كوكتەمدە قاراعاندى وڭىرىندە بولعان تابيعي اپاتتا 2 مىڭعا  جۋىق وتباسى زارداپ شەككەن بولاتىن.

نۇرا مەن شەرۋباينۇرا وزەندەردىڭ جاعالاۋىندا 50-گە جۋىق ەلدى مەكەن ورنالاسقان. وتكەن جىلى بۇل اۋىلدار قىزىل سۋدىڭ استىندا قالعان بولاتىن. توتەنشە جاعداي قىزمەتى ماماندارىنىڭ ماقساتى – بيىلعى سۋ تاسقىنىن الدىن الۋ. ءقازىر وڭىردەگى ءىرى سۋ قويمالارى سامارقاند، شەرۋباينۇرادان جينالعان سۋ قورىن اعىزۋ جۇمىستارى جۇرگىزىلۋدە.

ۆلاديمير بەككەر، ق ر ءىىم تج كوميتەتىنىڭ ءتوراعاسى: - جالپى ايماق بويىنا ەشقانداي ءقاۋىپ ءتونىپ تۇرعان جوق. بىلتىرعى توپان سۋ بيىل بولمايدى دەگەن سەنىمدەمىز. جوسپارلانعان دايىندىق جۇمىستارىنىڭ بارلىعى جۇزەگە اسىرىلدى، سوندىقتان سۋ تاسقىنى بولمايدى دەپ ۇمىتتەنەمىز. جالپى150 ەلدى مەكەن ءقاۋىپتى ايماققا كىرىپ وتىر. وندا تۇراتىن تۇرعىندار سانى 40 مىڭعا جۋىق. ءقازىر وبلىستا 50 سۋ تاسقىنىنىڭ الدىن الۋ جۇمىستارى جاسالدى. ال ازىق-تۇلىك قورى 250 توننانى قۇرايدى.

اندرەي لياپۋنوۆ، وبلىس اكىمىنىڭ ورىنباسارى:

- بيىل ءبىز جوسپارلانعان سۋ بوگەتتەرىنىڭ قۇرىلىسىن تولىق اياقتادىق. اپات بولعان جاعدايدا دا كوشىرىلەتىن بەكەتتەر دايىن، ازىق-تۇلىك نەمەسە جانار-جاعارماي سياقتى قاجەتتى زاتتار ساقاداي ساي تۇر. ايماقتىڭ 800-گە جۋىق شاقىرىمىن ۇشىپ وتكەن توتەنشە جاعداي قىزمەتىنىڭ ماماندارى وبلىستىڭ باتىس، سولتۇستىگى مەن وڭتۇستىك-باتىسىندا قار جوق ەكەنىن ايتتى. ال سولتۇستىك-شىعىس پەن وڭتۇستىك-شىعىس اۋماقتارىندا قاردىڭ مولشەرى ايتارلىقتاي كوپ. «تابيعي اپات ءقاۋپى تەك اۋا رايى كۇرت جىلىنعان جاعدايدا عانا بولادى. دەگەنمەن، بيىل جۇرگىزىلگەن دايىندىق شارالارى مەن اۋا رايى بولجامى تابيعي اپاتتىڭ بولماۋىنا ءۇمىت بەرەدى»، - دەيدى ماماندار.