تاۋەلسىزدىگىمىزدى العاشقى بولىپ مويىنداعان تۇركيا – بۇگىندە ەلىمىزدىڭ ەۋرازيا قۇرلىعىنداعى ماڭىزدى ءارى سەنىمدى ارىپتەسى. ەڭسەمىزدى ەندى تىكتەي باستاعان ۋاقىتتاردان بەرى ءتۇبى ءبىر تۇركىلىكتىڭ نەگىزىندە قوس ەل ىنتىماق پەن بەرەكەنىڭ كەرەمەت ۇلگىسىن كورسەتىپ كەلەدى. 1990 جىلدىڭ جەلتوقسان ايىندا ەكى ەل اراسىندا ءبىلىم بەرۋ، عىلىمي جوبالار جاساۋ، ءوزارا تاجىريبە الماسۋ، ورتاق مادەني شارالار جۇرگىزۋ جونىندەگى كەلىسىمگە قول قويىلدى،-دەپ حابارلايدى «قامشى» پورتالى.

بۇل كەلىسىم ۇزاق ۋاقىت بويى ءۇزىلىپ قالعان مادەني بايلانىستى قايتا جانداندىردى.

ءال-فارابي اتىنداعى قازاق ۇلتتىق ۋنيۆەرسيتەتى باسشىلىعىنىڭ ىستامبۇل ۋنيۆەرسيتەتى وكىلدەرىمەن كەزدەسۋى وسى رۋحاني بايلانىستىڭ زاڭدى جالعاسى ىسپەتتى. تۇركيا ەلىنەن كەلگەن دەلەگاسيا قۇرامىندا ىستامبۇل ۋنيۆەرسيتەتىنىڭ رەكتورى، پروفەسسور ماحمۋت اك، وسى جوو-نىڭ پرورەكتورى، پروفەسسور بايرام مەرت ساۆرۋن مەن ۋنيۆەرسيتەتتىڭ باس حاتشىسى، پروفەسسور مەتين كۋچۋك بولدى.

كەزدەسۋ بارىسىندا نەگىزگى ماسەلەلەر بويىنشا ەكى ۋنيۆەرسيتەت اراسىنداعى ىنتىماقتاستىقتىڭ دامۋ جوسپارى، اتقارىلاتىن جۇمىستاردىڭ باعىتى قاراستىرىلىپ، ىقپالداستىق جونىندەگى مەموراندۋمعا قول قويىلدى. سونداي-اق، قازۇۋ رەكتورى عالىم مۇتانوۆ ۇلتتىق ۋنيۆەرسيتەتتە يۋنۋس ەمرە اتىنداعى مادەني ورتالىقتىڭ اشىلاتىندىعىن جەتكىزدى.

جوعارى وقۋ ورىندارىنىڭ اراسىنداعى ەكىجاقتى قاتىناستاردىڭ قارقىندى دامۋى، ءال-فارابي اتىنداعى قازاق ۇلتتىق ۋنيۆەرسيتەتى مەن ىستامبۇل ۋنيۆەرسيتەتىنىڭ ۇستانىمدارىنىڭ ۇقساستىعى كوپجاقتى ىنتىماقتاستىق ماسەلەلەرىنىڭ كەڭ اۋقىمى بويىنشا ءوزارا تۇسىنىستىكتى قامتاماسىز ەتۋگە نەگىز بولۋدا. الداعى ۋاقىتتا ستۋدەنتتەرمەن جانە وقىتۋشىلارمەن الماسۋ بەلسەندى جۇزەگە اساتىن بولادى. بيىلعى جىلى قازۇۋ-عا تۇركيادان 20 شاقتى ستۋدەنت وقۋعا جىبەرىلەدى دەپ  كۇتىلۋدە.

 ءوز كەزەگىندە ىستامبۋل ۋنيۆەرسيتەتىنىڭ رەكتورى، پروفەسسور ماحمۋت اك مىرزا جاقىن ارادا ۋنيۆەرسيتەت كولەمىندە ءال-فارابي ورتالىعىنىڭ اشىلاتىندىعىن ايتىپ، تەحنوپارك ماسەلەسىنە توقتالدى.

«ءبىز تەحنيكالىق ۋنيۆەرسيتەت ەمەسپىز. دەگەنمەن، تەحنوپارك ماسەلەسى بىزدە جاقسى دامىعان. الداعى ۋاقىتتا سالالىق، ناقتى تەحنوپاركتەر جۇمىسىن قامتاماسىز ەتۋ جوسپاردا بار. ماسەلەن، مەديسينالىق تەحنوپارك. بۇل جوبا ءبىزدىڭ ەلدە ۇكىمەت تاراپىنان قولداۋعا يە بولدى. بۇگىندە ۋنيۆەرسيتەتتىڭ 5 اۋرۋحاناسى جىلىنا 2 ملن 600 مىڭ ادامدى ەمدەيدى جانە قازۇۋ-دا قىزمەتىن ەندى باستاعان مەديسينالىق فاكۋلتەت ءۇشىن بۇل ىنتىماقتاستىق جاقسى تاجىريبە بولماق»، – دەدى ماحمۋت اك مىرزا. كەزدەسۋ سوڭىندا قازۇۋ-دىڭ عىلىمي كەڭەسى وتىرىسىنا قاتىسقان ىستامبۇل ۋنيۆەرسيتەتىنىڭ رەكتورى ماحمۋت اك ءال-فارابي اتىنداعى قازۇۋ-دىڭ قۇرمەتتى پروفەسسورى اتانىپ، قازۇۋ دوستار كلۋبىنىڭ مۇشەلىگىنە قابىلداندى.