ءال-فارابي اتىنداعى قازاق ۇلتتىق ۋنيۆەرسيتەتىندە فيلولوگيا جانە الەم تىلدەرى فاكۋلتەتىنىڭ ۇيىمداستىرۋىمەن «قازىرگى زامان كەيىپكەرى. گەرولد بەلگەر» تاقىرىبىندا دوڭگەلەك ۇستەل ءوتتى، - دەپ حابارلايدى «قامشى» پورتالى.

اتالمىش ءىس-شاراعا  «ليتەراتۋرنايا الما-اتا» الماناعىنىڭ رەداكتورى رايحان بەكتەمىسوۆا، بەلگىلى جازۋشى ۆلاديمير ۆاسيليەۆ، گەرولد بەلگەردىڭ جارى رايسا حيسماتۋللينا، ءبىرقاتار قوعام قايراتكەرلەرى، عالىمدار، دوكتورانتتار، ماگيسترانتتار مەن ستۋدەنتتەر قاتىستى.  سونىمەن قاتار دوڭگەلەك ۇستەل جۇمىسىنا  ونلاين جۇيەدە س. بايىشيەۆ اتىنداعى اقتوبە ۋنيۆەرسيتەتىنىڭ، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ جانە قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ءتىل جانە ادەبيت سالاسىنىڭ عالىمدارى قاتىسىپ، جازۋشىنىڭ ءومىرى مەن شىعارماشىلىعى تۋرالى ءوز پىكىرلەرىن ءبىلدىردى.   

گەرولد بەلگەر جازۋشى، ادەبيەتتانۋشى، اۋدارماشى، پۋبليسيست جانە قازاق ەلىنىڭ پاتريوتى بولدى. ول قازاق ادەبيەتىنىڭ بەيىمبەت مايلين، عابيت مۇسىرەپوۆ، ءابدىجامىل نۇرپەيىسوۆ سەكىلدى كلاسسيكتەرىنىڭ شىعارمالارىن ورىس تىلىنە اۋدارعان. سونداي-اق ونىڭ 53 اۆتورلىق كىتابى بار.

ءال-فارابي اتىنداعى قازۇۋ پروفەسسورى، فيلولوگيا عىلىمدارىنىڭ دوكتورى الۋا تەمىربولات: «وسكەلەڭ ۇرپاقتى ۇلگى تۇتار تۇلعاسىز تاربيەلەۋ قيىن. ءبىزدىڭ ويىمىزشا، گەرولد بەلگەر – قازىرگى زاماننىڭ ناعىز كەيىپكەرى، قاhارمانى. ويتكەنى، ول ۇلتى باسقا بولسا دا جۇرەگى قازاق دەپ سوققان جازۋشى بولدى. كوزى تىرىسىندە تالاي قوعامدىق ماسەلەلەرگە ءۇن قوستى. سولاردىڭ ىشىندە قازاق حالقى مەن قازاق ءتىلىنىڭ تاعدىرى ونى قاتتى مازالايتىن، – دەي كەلە، گەرولد بەلگەر تۋىندىلارىن تەرەڭ فيلوسوفيالىق، پسيحولوگيالىق جانە ەتيكالىق شىعارمالارعا جاتقىزۋعا بولاتىندىعىن ايتتى. «جازۋشى ءوز شىعارمالارىندا فيلوسوفيالىق تۇرعىدان ويلانا وتىرىپ، پسيحولوگيالىق جانە ەتيكالىق ماسەلەلەردى كوتەردى. ونىڭ كەيىپكەرلەرى قاشاندا كوپ ويلاناتىن، ىشتەي تولعانىپ جۇرەتىن ادامدار. ادام قانداي بولۋى كەرەك؟ بولمىس، ماحاببات، باقىت، دوستىق دەگەن نە؟ ادام مەن قوعام اراسىنداعى بايلانىستى قالاي ورناتۋ قاجەت؟ بۇل سۇراقتارعا جاۋاپتى ونىڭ شىعارمالارىنان تابۋعا بولادى»، – دەدى ول.